ممكن ساعات
 

[SIZE="6"](sml24)

ممكن ساعات
نحرم قلوبنا من الأمل
علشان دا موش
من حقنا
نحلم بإن الحلم يوم
هايكون لنا
أو إننا
ممكن في ثانية نحققه
فبنخنقه
بالصمت ونعيش عمرنا
وسط الألم
وتدور سواقي العمر
ويدور الزمن
نطوي الضلوع على جرحنا
ندفع تمن
خوفنا وسكوتنا وعجزنا

ممكن ساعات
ندفن همومنا ونبتسم
بسمة وخلاص
فوق الشفايف تترسم
ولا حد عارف ولا شايف
أد ايه القلب حاسس بالألم
بركان ندم
جوانا بيداري الحمم
نهرب من الأحلام ساعات
ونتوه في أحزانا ساعات
وساعات تاخدنا الذكريات
ونفوق ونندم ع اللي فات
وتسيل دموع زي السيول
فوق الخدود
نمسحها بكفوفنا ونضيع
بين الجموع
وما بين حقيقة ووهم عايشين
ميتين
وف كل لحظة تعدي
بيزيد الأنين
يفضل سؤال
يا هل ترى
م العمر كام
فاضل سنين ؟
أيام ؟ شهور؟
ولا دقايق
أو ساعات ؟[/SIZE]