شمروخيل
*********
قمت من سقطتى لاجد أمامى <ياحفيظ يارب >..لاجد أمامى شيطان صغير مرعب الهيئة ,,,شنيع الطلعة ..
.ولولا أننى فعلاً فى عداد الاموات لمت من وقتى ثانياً...ولكن نقول أية ..مفيش فايدة ...أقتربت من هذة
الكارثة التى تقف أمامى وبكل هدوء مصطنع وحذر قلت لة : مرحب يا....يا ....ياأستاذ
ضحك هذا البلاء الواقف أمامى ضحكة مريعة لم أرى أقبح ولا أشنع منها فى حياتى...حتى أننى أحسست أن
ضحكتة أنياب تمزقنى
رد الكائن هذا قائلاً : أهلاً ياصياد...أهلاً بك بين أخواتك وأحبائك ..أهل الجحيم...أحب أعرفك بنفسى ...أنا
أسمى شمروخيل..وأعمل هنا مشرف أستقبال
أبتسمت قائلاً : مشرف ..هو فية هنا مشرفين كمان؟؟؟
رد شمروخيل فى خبث : أينعم...هنا كل شىء بنظام ...هنا يوجد مشرفين ورؤساء أقسام...ورؤساء رؤساء
أقسام ومشرفين فروع ورؤساء أشراف فروع ....الخ الخ وهلم جرا
قلت فى دهشة : ياساتر يارب ...هو هنا كمان فية أقسام ومستويات
نظر لى شمروخيل بعيونة الحمراء كجمرات متوهجة قائلاً :طبعاً ..طبعاً ...هنا كل واحد فى قسمة وكل واحد
فى مكانة المخصص والمعد لة من قبل تأسيس العالم
ضحكت فى بلاهة أحسد عليها قائلاً : أيوة...أيوة يعنى ذى ما تقول كدة <كل برغوت على قد دمة >
لكزنى شمروخيل بحربتة ذات الثلاث رؤوس قائلاً :أنت جى تهرج هنا كمان...والا تكنش فاكر نفسك معزوم
على حفلة شاى....أصحى.بم بم بم...فوووق.بم بم بم...أصحى..بم بم بم...فوووق
نظرت لشمروخيل قائلاً فى نفسى : <أية العبيط دة> ثم أنفجرت فية قائلاً :اية ياعم ...هوأنت
هتغنهالى..خلاص عرفنا ......خلصنى بقى
رد شمروخيل وهو يهز رأسة : يعنى أية أخلصك ؟؟....هو أنت جى تاخد حقنة!!....يابنى أنت فى
جهنم...عارف يعنى أية جهنــــــــــــــم ؟؟؟؟
أنفجرت فى هذا الشمروخيل الرذل قائلاً :خلاص ....متفولش فى وشى ....عرفنا أننا متئندلين فى جهنم ...
ورينى مكانى ياعم المشرف بقى
أبتسم شمروخيل فى دهاء أبتسامة صفراء رهيبة قائلاً :اية ...حيلك حيلك...هو بالساهل كدة تروح مكانك
مش الاول تتعرف على الاقسام والفروع بتاعة الاقسام وطبقات جهنم السبع...وتتقابل مع الريس بتاعنا
دارت الدنيا أمام عينى قائلاً :هو فية أية بالظبط .!!!.هو أنا جى هنا فى رحلة والا جى اتملى فى جمال المكان
رد شمروخيل : بص يابنى ....هو دة نظامنا...ولو مش عجبك,,,, أمشى.... وورينى جمال خطوتك
أنفجرت فى الضحك من كل قلبى قائلاً فى مرارة : أمشى ...حلوة النكتة دة ..أمشى أروح فين؟؟..هو ياعم
شمروخيل الموضوع بأيدى ....باين فعلاً أبتدى العذاب معايا بدرى
رد شمروخيل فى هدوء : طب لما أنت عارف أنك مش ممكن تمشى ولا تسيب جهنم.....لية مش عايز تمشى
على نظامنا هنا ؟؟؟
قلت لهذا الشمروخيل فى يأس : ياعم شمروخيل نظامكم على عينى وراسى من فوق ...بس الموضوع مش
مستحق اللف والدوران...أنا خاطى وعاصى وناقص تربية...
رد شمروخيل فى تريقة : دة شىء مفروغ منة ...أينعم
نظرت لة فى غيظ ثم أكملت: طب لما أنا كدة ومعروف نهايتى ...وأنا مش معترض على النهاية دة...أية بقى
لزمتة المشورة والفرجة على مخاليق اللة وهى بتتعذب....يعنى أنت عايزنى فى الاول أترعب من اللى
هشوفة وأحسة قبل ما يحصللى؟؟
رد شمروخيل الداهية : مش بالظبط كدة....بس هو دة نظامنا...وأنا مش ممكن الخبط نظام جهنم علشان
خطرك....أنت عايز تجبلى مشكلة...عايزنى بعد العمر دة كلة فى جهنم وتعب العصور والازمنة لحد مابقيت
مشرف عام أخد لفت نظر والا خصم من رؤسائى...لا يا عم النظام مش ممكن ينكسر هنا....
قلت لهذا المغفل : أوكى...مفيش مشكلة...أنا معاك لاخر المشوار بس ...الجدع اللى ميصرخش فى الاخر
جلس شمروخيل خلف مكتب أتى لة من العدم فاتحاً دفتر هائل الحجم أحمر اللون كلون الدماء وبريشة طويلة
بدء يكتب قائلاً : أسمك أية ؟؟
نظرت لشمروخيل فى أستغراب وضيق قائلاً : ياصبر أيوب
رد شمروخيل: أذاى الكلام دة ...أذاى أسمك صبر أيوب دة مش موجود عندى؟؟
أنحنيت على هذا الشيطان الغبى المتسرع قائلاً لة : ياعم شمروخيل ..لو بس كنت صبرت على ثانية كنت
قلتلك أسمى
نظر لى الشيطان قائلاً : أمال صبر ايوب دة يقربلك أية؟؟
قلت: يابا....ياعمى....ياخالى.....ياولدى ....أنت أبيض خالص كدة....دة مصطلح أرضى بنقولة لما الواحد
بيكون قدامة بلوى أو كائن غبى ومش عارف يتفاهم معاة ...فاهم
رفع نظرة شمروخيل وهز رأسة علامة الفهم ثم قال فجأة : يعنى أية كلامك دة؟؟...يعنى أنا غبى ومش عارف
تتفاهم معايا
ضحكت فى خوف أمام غضبة شمروخيل وقلت لة فى ود زائف : لا...حاشا وماشا...أذاى أنا الانسان
المتخلف عن ركب جهنم أعيب فى الذات الشمروخية...لا أنت فهمتنى غلط...المهم..أنت مش عايز أسمى
رد: أينعم
قلت : أسمى صائد الذباب
قال : سنك؟؟
قلت : مابين الثلاثون والسبعون
ترك شمروخيل ريشة الكتابة قائلاً فى غضب: هنرجع تانى للتهريج والتريقة
قلت فى ضعف كاذب: أية تانى ياعم ...حصل أية ؟؟
قام من مكانة قائلاً : أنا بقولك سنك كام ...تقول من تلاتين لسبعين!!!!...تيجى أذاى دة بقى
أبتسمت قائلاً فى ود :صدقنى ...هى دة الحقيقة ومفيش لا تريقة ولا حاجة....
أنا ساعة لما أتجننت وعملتها وأنتحرت فى لحظة غباء لا مثيل لة كان عمرى خمس وثلاثون عاماً...ومن
وقت طلوع روحى لغاية لما أتكحلت عيونى بطلعتك البهية كانت بضع ساعات ...واللى أنا عرفة أن الزمن
فوق يومة بالف الف عام من زمننا على الارض ...يعنى بحسبة بسيطة تلت ساعات من ساعة الرحلة بحوالى
أربعين سنة على الارض ...يبقى عمرى دلوقتى سبعين سنة ...خلاص
نظر لى شمروخيل نظرة المغتاظ الذى أفلت من بين يدية فريستة قائلاً : ماشى هنفوت دة
رجع للخازوق الجالس علية خلف مكتبة النارى قائلاً :من فحصى لسجلك وبياناتك ملهوش لزوم
الاسئلة....ودلوقتى نبدء رحلتنا لاول طبقة ودور من أدوار جهنم ...فى حاجة عايز تعرفها قبل ما نبدء
قلت لة : أيوة...عايز أعرف حاجة دهشانى من ساعة ما جيت هنا
نظر لى شمروخيل فى تسائل : أية الحاجة دة؟؟؟
تململت فى وقفتى قائلاً : اللى بسمعة عن جهنم هو نار وشياط وناس بتصرخ وولعة ملهاش ذى...وبصراحة
من ساعة مادخلت هنا وأنا مش لاقى حاجة خالص من الكلام دة
لدرجة حاسس من كتر الهدوء هنا أن ممكن فجأة كمان الاقى موسيقى شاعرية تملى المكان..أية الحكاية؟؟؟؟
ضحك شمروخيل وطبطب على ظهرى فأحسست بنار تلسعنى فى قفاياوشممت رائحة شياط لحمى ثم رفع يدة
قائلاً :شوف يابنى...الكلام بتاع الارض عن النار والعذاب ..دة كلة أركنة على جنب....هو كلام مش كذب ولا
هو الحقيقة بحزفرها...دة تشبيهات أرضية حسية للى بيحصل هنا ...علشان يقربوا الموضوع من المخ البشرى
المحدود...يعنى النار..مش نار بالمعنى الارضى...والعذاب مش عذاب واحد ولا نوع واحد من العذبات...دة
فية أشكال والوان من العذاب..وكل عذاب لة صاحبة ...وكل خطية لها عذبها المتفرد ...أحنا هنسبق الاحداث
لية؟...واحدة واحدة هتعرف كل حاجة كفاية كدة وياللى بينا
أنحنى هذا الشيطان الشنيع قائلاً : أركب على أكتافى وأمسك كويس
فزعت من الفكرة صارخاً فية : أية ياعم ..يعنى كل النظام دة وفى الاخر نرجع للعصر الحمارى فى
التنقل...يعنى مفيش عربية ولا حتى عجلة أو تلفريك ينقلنا
سحبنى هذا المعتوة من قفايا ووضعنى فوق أكتافة قائلاً : كفاية تزمر وتضيع وقت..أمسك كويس.....هالا ...هوووب
******************
وغداً مع الحلقة الثانية
تحياتى
الصياد من أمام أبواب جهنم وبئس المصير
|