|
شهادات أخرى
1- (أحد أهالي القرية المسيحيين- 41 عاما)
حى على الجهاد!
"لم تكن هناك أية مشاكل بين المسيحيين والمسلمين فى القرية منذ سنوات عديدة. وفى يوم الاربعاء كنت أنا نائم واستيقظت على الصراخ ووجدت النور انقطع وصعدت فوق سطح المنزل لأرى ما حدث ففوجئت بأشخاص كثيرة يقولون "لا إله إلا الله" و "حي على الجهاد" وكان عدد هؤلاء الاشخاص كبير جدا. وكانوا يمسكون بزجاجات من البنزين يقومون بالقائها على المنازل وايضا يقومون بضرب الناس بالشوم فى الشارع ومن هؤلاء الاشخاص الذين تم ضربهم مواطن مسيحى اسمه كمال شاكر وقد توفى. والحكومة كانت موجودة أمام باب الكنيسة وممتنعة عن الدخول بالرغم من وجود الحرائق والهجوم، ولقد قاموا بالقاء الزجاجات على اسطح المنازل وبعد ذلك سمعت صوت من أحد رجال الشرطة يقول للاشخاص المسلمين الذين كانوا بيهجموا علينا "انتوا اخدتم ما تريدون كفاية كدا" وبعد ذلك قام هؤلاء الاشخاص اللى كانوا بيهاجمونا بخطف الصليب من على سور الكنيسة وأخذوا يرددون جملة "الكنيسة اتحرقت والقسيس مات" ونحن كنا نقوم بالقاء الطوب عليهم من على أسطح المنازل. وأثناء الضرب كان الغفر يرشدون الناس على أماكن الدخول للكنيسة!!
وبعد ذلك قام هؤلاء المسلمين بغلق الابواب علينا من الخارج حتى لا نستطيع الخروج من منازلنا واستمر الهجوم من الساعة 7 مساءاً حتى 11 مساءاً . وهذا اليوم كان ليلة عيد الغطاس وكانت الحكومة تمنع المسيحيين من دخول الكنيسة. وكما قلت لكم أنه لم تكن توجد أية مشكلة بيننا وبين الأخوة المسلمين من قبل ولكن المشكلة بيننا بدأت بسبب اننا نريد ان نقيم الصلوات فى الكنيسة.
2- (أحد أهالي القرية من المسيحيين- 29 عام)
"قبل تلك المشكلة كانت علاقتنا بالاخوة المسلمين جيدة جدا ولم تكن هناك أية خلافات بيننا، ولم تحدث ايه احداث شبيهة بتلك الواقعة قبل ذلك. وانا كنت جالس فى المنزل وانقطع النور بكل القرية وكنا نسمع هتافات "الجهاد" و "الله اكبر" و "لا إله إلا الله" وكانوا أشخاص كثيرين لأن صوتهم كان عالي جداً. وبدأوا باطلاق زجاجات البنزين واشعال النيران على المنازل والنخيل
حيث قاموا بالقاء تلك الاشياء على الكنيسة والمنازل المجاوره ، وكانوا يقومون بضربنا بالطوب اثناء هروبنا من المنازل بسبب النيران، وبعد ذلك حضرت المطافئ ولم يقم عامل الاطفاء باطفاء النيران بل قام باطلاق المياه على الكنيسة لكي يقوم بهدمها. وبعد ذلك قمنا بأخذ الخرطوم من ذلك العامل الاطفاء النيران من الكنيسة وبعد ذلك قام العساكر باخذ الخرطوم منا لاطفاء النيران التى بالطريق. وبعد ذلك وجدنا هجوم على المنازل وتكسير تلك المنازل ووجدنا أن هناك اشخاص منا مصابين، وكان ذلك الهجوم من الساعة 7 إلى الساعة 11م. ونحن كنا نقوم قبل هذه الاحداث بعمل الشعائر الدينية بالكنيسة كل يوم واحيانا كل أسبوع.
3- أحد أهالي القرية المسيحيين
قبل الأزمة بـ 15 يوم!!
"فيه اسماء عايز أقول عليهم من البلد هم (اسماعيل محمد اسماعيل)، و(محمود عبد الرحيم عبد الرسول)، و(علاء عبد الرحيم عبد الرسول)، و(محمود عبد الرحيم عبد الرسول)، و(عماد عبد الرحيم عبد الرسول)، و(أحمد عواجة على عبد الله)، و(خالد ثابت)، و(محمد عبد الوهاب خليل)، و(صفوت حسن حسانين)، و(أحمد فرغلى)، و(عبد العاطي قنجة)، و(حجاج احمد ابو الديك)، و(عمر محمد خليل)، و(محمد خليل رشوان) الاسماء دي هم اللى بيخططوا مع الحكومة ومعاهم ممدوح حسن سعد عضو مجلس الشعب السابق والمحرض الكبير والمشعل للفتنة دى ولما سألنا الناس المذكورين دول عن علاقتهم بالشرطة قالوا مفيش بينا وبين الشرطة أى ود أو علاقة ولكن احنا بنود الشرطة وبنستضيفهم ونقدم لهم الخدمة علشانكم. والشيخ عبد الصبور "شيخ البلد" و سيد فؤاد "الخفير" و محمد عبد السلام "الخفير" و لملوم "الخفير" هم اللى خلوا الناس ثارت وحصل اللى حصل والخفر اعتدوا عى الحريم وضربوهم. وفيه لغاية دلوقتي واحدة فى المستشفى وهى زوجة حفظي صالح. ووقت مابدأت الناس تيجي من كل ناحية وهاجوا علينا كان الأمن واقف على البلد ومنهم ضباط كانوا عند دكان جزارة بتاع واحد اسمه "أحمد عواجه" راح دخل الضباط الدكان علشان يخلى الناس تعدى. والحكومة كانت موقفة خفر على الكنيسة من 15 يوم قبل حدوث المشكلة ومكناش عارفين ليه وقبل المشكلة بثلاثة أيام لقينا عربيات الشرطة فى البلد..
4- (أحد أهالي القرية المسيحيين)
مخطط كبير
"المكان اللى عليه المشكلة كنيسة من سنة 1971 كنا بنصلى فيها وكنا بنعمل فيها القداس، مش مضيفة زى ما بيقولوا. وكانت مفاتيحها مع الآباء القسس مش مع أى أحد تاني. وكنا بندخل و نطلع عادى.. جات الشرطة فى يوم فجأة 10 أو 12عربية شرطة مرة واحدة سالناهم ايه؟ قالوا لنا فيه قرار بفتح الكنيسة واحنا جايين لحمايتكم.
ويوم الاربعاء قبل وقوع المشكلة كنت بعمل قهوة فى مركز شباب القرية للضباط وراحت الكهرباء قاطعة فى المنطقة بتاعتنا احنا بس والميه برضه. لقينا الأهالي كانو بيرموا كور النار من فوق وفيه طفل مات من الخوف، لقينا الاهالي جايين من خلفنا والحكومة بترمى أمامنا قنابل مسيلة للدموع.
الموضوع مخطط كبير مش صغير من كبار البلد غرضهم يهدوا الكنيسة زى ما هدوها قبل كده وفيه واحد مننا ذراعه انكسر واتخرشم راح لمستشفى الدولي بالأقصر، وطلعوه بعد 3 أيام وركبوله 3 شرائح.
5- مواطن من قرية الضبيعات
أنا مش جاى أحرسكم.. عليكم بيهم
"الارض المحيطة بالكنيسة ملك لمطرانية الاقباط الأرثوذكسية بالاقصر.. ولا يملكها شخص بعينه. عضو مجلس الشورى الاستاذ/ على العديسي قال "لو اتفحت الكنيسة هنا يبقى وصمة عار علينا" ومدير أمن الاقصر(محمد نور) قال " أنا مش جاي أحرسكم أنا جاي امنعكم انكم تصلوا فى الكنسية" وهو طالع قال للناس الموجودة عليكم بيهم. فى يوم الحادثة كنت مع أبونا بنصلى لعيد الغطاس وبعدين التليفونات اشتغلت على ابونا لتبليغه بالحادث اللى فى قرية العديسات. اتصل ابونا باثنين كهنة علشان يقوموا بالصلاة بدلا منه وهو حاينزل العديسات علشان يشوف الحكاية. واحنا جايين للقرية، الناس اتصلت بابونا ونبهوا عليه انه يرجع للخوف عليه من اللى حاصل. انا بتردد على العديسات من يوم الحادث ومفيش اى أثار علينا فى قريتي من المشكلة اللى كانت هنا، وقبل كده كنت باجى مع أبونا لما يبقى فيه اى مشكلة نحتاج أنه يحلها واحنا هنا عايشين كلنا مع بعض مسلمين ومسيحيين. وكل اللى عاوزينه انه نبقى فى حياة هادئة والاعلام مفروض أنه يشارك فى الأحداث على أننا يد واحدة أقباط ومسلمين لأننا فى بلد واحدة وبنشارك فى كل حاجة منذ زمن.
|