[yaweeka]

فاكر اليوم ده كويس
يوم الخطاب كنت عيل صغنطوط كدة
وكان التليفزيون اختراع جديد ، فكل الشباب القبطى فى المنطقة تجمعوا عندنا لمشاهدة الخطاب
طبعا اول ما السادات قال الجملتين الخايبين دول لاقيت الشباب اللى متنرفز واللى قاعد يعيط واللى بيقول لازم نعمل حاجة نرد بيها على الكــلب ده ، والعبد لله طبعا كان زى الأطرش فى الزفة
تانى يوم فاكر ان عنوان الجرائد كان "عزل شنودة من منصبه"
قلت مين شنودة ده؟ انا اعرف البابا شنودة اللى هو برضو اسمه الأنبا شنودة رئيس المتوحدين ويعنى ايه هو مش ها يبقى رئيس المتوحدين تانى؟ يعنى ها يعمل ايه اكثر من انه متوحد يعنى؟

بعدها بكام أسبوع كنت عند عمى فى البيت ولاقيته فجأة زأطط والشارع كله مزأطط بمسلميه ومسيحييه اول ما سمعو الخبر
جرى ايه يا اخوانا؟
اصلهم اغتالوا السادات
يعنى ايه اغتالوه دى؟
يعنى خرموه بالرصاص فى قلبه ياللا يا لمض انت
يعنى مات يعنى؟
لسه ما نعرفش بس يستاهل...اللى ييجى على الكنيسة لازم يلاقى جزاءه من ربنا
طيب يعنى ها يحصل ايه
طبعا عمى عمل فيها رجل سياسى وهاتك يا توقعات سياسية
راح السادات وجاءنا مبروك
ييجى يوم العيد ، الاقى ابونا بيعيط فى الكنيسة
هو ايه يا عم هو بيعيط ليه؟
اصله بيقرا رسالة العيد اللى بعتها البابا شنودة لكل الكنائس لأنه محتجز فى الدير
يعنى ايه محتجز؟ هو مش ممكن يركب العربية ويصلى صلاة العيد بنفسه؟
بس يابنى انت مش فاهم حاجة ، ابونا بيقول العيد الجاى فيه وعد ان البابا ها يصلى العيد بنفسه
يعدى عيد...ومن بعده عيده وفى وسطهما عيد والبابا محتجز فى الدير
بعدها بكام سنة كدة ابونا بيقول : فيه خبر حلو
البابا ها يفرجوا عنه قبل العيد اللى جاى
ياويكا ( يا ابونا انا زهقت من موضوع ها يطلع قبل العيد دى)
ما يطلع لوحده يعنى هم ها يقدروا يعملوا له حاجة؟ طيب ده انا عندى طبنجة صغنطوطة كدة ممكن اطخ اللى ييجى ناحية البابا وانا قاعد فى بيتنا انشن عليه من بعيد

بس يظهر ان مبارك سمعنى وانا باقول موضوع الطبنجة ده وصدق فى كلامه واصدر قرار برجوع البابا الى كرسيه
شفتوا ازاى انا اللى طلعت البابا؟