[FiberOptics]

ملاحظة : انا كتبت الموضوع ده كرد على موضوع .. وكلن بعد اكتشفت انه ممكن يبقى موضوع .. واتمنى يعجبكم


صراحة يا جماعة انا اتصدمت لما لقيت ان المنتدى اغلب الموجودين فيه مصريين
ببس الي شايفه بيقول ان مش هو ده المصري الي يجرح في ابن بلده مهما كان خلافه ده حتى الكلام الغير قابل حتى لاسلوب نقاش متحضر
يا جماعة انتم مش شايفين ايه الي حاصل هنا انا شايف ان اغلب المواضيع هنا مجرد هزار وضحك وسخرية ومفيش اي حوار نحاول نصلح بيه أخطاء كتير حاصلة في مجتمعنا العربي مش حقول الاسلامي او القبطي حقول المصري .. لاني ملاحظ ان اغلبنا هنا مصريين انا بيتهيالي كده ولا انا غلطان .. انا اي نعم مسجل من مدة في المنتدى لكن لم تتسنى لي فرصة الاطلاع على محتوياته الا الان وبدافع الفضول ولكن بصراحة انا اتصدمت
انا على فكرة مسلم وليا اصحاب مسيحيين هم اي نعم مش كتير .. بس انا بحبهم وهم كمان بيحبوني .. واكيد كلامكم مش حيفسد صداقتنا على الاقل من ناحيتي
انا مش عالم في أصول او علوم الدين .. بس انا ححاول اوضح على اد ما اعرف واحاول افسر واوضحلكم بعض النقاط

بداية : مهما كانت الديانة .. وحتى إن لم يكن ما يؤمن به الانسان هو دين .. لو كان بيؤمن بفكرة .. أكيد ليه اسبابه وليه مبرراته الي لازم غيره يحترمها فما بالكم بمجموعة كبيرة من الناس بتؤمن بعقيدة معينة او فكرة معينة مش ده يستاهل مننا مهما كنا شايفن انهم غلط اننا نحاول نفرمل في تعدينا عليهم ونحاول نفهم هم بيقولو كده ليه او على الاقل لا نهاجمهم ونحاول نهد عقدية حياتهم كلها مبينة عليها .. ده حتى يبقى غلط
وهل المسيح عليه السلام حث في رسالته وكلامه وافعاله على هذا الخلق اللهو والعبث بافكار ومذاهب اخريين ولا حتى اي رسول او نبي من الانبياء كان يدعو للاستهزاء باي شخص مهما كان فكره او مذهبه .. الديانات السماوية ديانات رحمة ونور وثقافة نزلت عشان كل البشر وعشان تنظم علاقتنا ومجتمعاتنا وتحثنا على الحب والود والعيش بسلام
اخواني .. لايوجد
انا هنا مش بدافع عن اي حد .. بس انا عايز انقل الكلام عشان يبقى كلام ناس عاقلة بتكلم بعضها

عايز برضه اقولكم على حكاية .. هي يمكن في خيالي دلوقت نكتة من بعد الي شوفته هنا
انا من الاسكندرية وتقريبا في اول يوم من احداث العنف الي حصلت في الكنيسة الموجودة في محرم بك .. كنت وانا وصديق ليا اسمه مينا ماشين على مسافة بعيدة من الكنيسة وكنا ماشين بنضحك وبنتخيل لو حد تعرضلنا فعلا من المجانين سواء كان مسلم او مسيحي او بيقول كده على نفسه وهو اساسا متخلف .. مش عايزكو تفهمو من القصة دي الا شيء واحد ..
فيه قسم كبير من الشعب المصري .. خلينا نقول بشقيه مسلم وقبطي عايزين يعشو في سلام مع بعض بس المتعصبين او الاغبياء بيفسدو علينا لحظات صداقة وحب وإخاء احنا محتاجين نعشيها كشعوب عربية لازم تنهض وتفوق بقى من الصراعات الغبية دي .. وتحاول تخلق فرصة للحوار والمناقشة .. مش في مسلم ولا مسيحي .. الدين ده بتاع ربنا
تخلق فرصة للحديث عن المستقبل وعن اولادنا في المستقبل .. وحرام علينا كشعوب عربية كانت اراضيها المهد الذي مشت فيه حضارات وعلماء وقديسين حرام علينا نحرم أطفالنا واحفادنا بعد كده من انهم يعيشو بسلام ويستمتعو باراضيهم وحضارتهم .. ومتنسوش ان في يوم من الايام زي ما احنا دلوقت بنتكلم عن التاريخ .. حيجي وقت واحفادنا حيجيبو في سيرتنا حاولو بقى لما يجبو سيرتنا يذكرونا بالخير مش بالتخلف والغباء الي احنا عايشين فيه ده

خلونا نكبر بقى .. ونتفاهم ولو لمرة واحدة .. عشان نستمتع بحايتنا ومنقضي حياتنا نسمع اخبار موت وحرب ودمار .. خلونا نسمع عن نشاطات ومحبة وإخاء ورحمة ونور وعلم وحرية


بقلم : اسماعيل ... FiberOptics