النهارده كنت جنب النادى اللى مادخلتوش من 200 سنة تقريبا
قلت أخش اشوف ايه اللى حصل و ايه التغيرات اللى حصلتله
لقيت كنبة فى حتة حلوة و هادية وسط الزرع الاخضر و الأحمر
الجو جميل و مغيم و انا بحب الدنيا لما تكون مغيمة كده
المهم قعدت اتفرج على اللى رايح و اللى جاى
واحد اجنبى غربى معدى قاللى بعربى ركيك "سلامو أليكو"
واحدة مزة معدية شعرها احمر و زى القمر بس للأسف ماقالتليش حاجة
و هكذا و هكذا عيال بتلعب بالعجل
ناس فى سن المعاشات بياكلوا أيس كريم
الغريب بقى و اللى لفت نظرى بجد عدد الحريم اللى لابسة خمار و الرجاله اللى مطولة دقنها
حتى الحريم اللى مش لابسة خمار لابسة حجاب و شفت اتنين لابسين نقاب كمان
الله يرحم ايام المنى جيب و الجينز اللى كنت بشوفهم زماااااااان فى النادى ده
خلاص انقرضوا و ايامهم راحت
حتى الخرونج صاحب الكافيتريا مشغل قرأن بعد ماكانت اغانى عمرو دياب و فارس و حميد الشاعرى بتجلجل زمان
مصر تعدوا نحو الاسلامة عدوا و انا اتوقع فى خلال 10-15 سنة مصر هاتبقى ايران السنة
يارب اهدى أمريكا علينا هى و الاتحاد الاوروبى و منظمات حقوق انسانهم لان الحكومة الدكتاتورية القمعية الشمولية المتمثلة فى حكومة حسنى مبارك هى خط الدفاع الوحيد و الأخير ضد الأسلمة