|
فيه ناس بيقولوا : المعونة الأمريكية المعونة الأمريكية ، المعونة الأمريكية 70 % منها معونة عسكرية عبارة عن أسلحة .. يعنى لو قالوا إن إجمالى المعونة عبر السنين هو 50 مليار بنلاقى 35 مليار منهم عبارة عن أسلحة
الأسلحة دى بترضى العسكريين وتخليهم راضيين لأنهم بيحسوا إنهم بيكتسبوا قوة جديدة ( لإستعمالها ضد إسرائيل لما يجىء الوقت ) ، وفى نفس الوقت بتوفر جزء من الميزانية ( اللى كانوا هيشتروا به أسلحة ) وما يتوفر لعدم شراء سلاح .. ممكن يعطوه للعسكريين علشان يبقوا مبسوطين ولا يقوموا بإنقلاب
والنهارده أمريكا وأوروبا واليابان والخليج بيعتبروا وحدة واحدة .. فلما أمريكا بتبقى راضية على بلد .. كل الفرقة الباقية يبقوا راضيين عنه ويساعدوه كلهم ، فده اللى بيحصل حالياً وفيه مساعدات كتيرة بتجىء من بلاد متعددة وخصوصاً المذكورين قبل كده ( اللى هم بلاد متقدمة أو غنية ) .. فكل الدول اللى مع أمريكا بتساعد مصر والمساعدات دى متهيألى أضعاف المساعدة الأمريكية ، والمساعدات دى بتتكتب ( لما يتم الإتفاق عليها ) فى الصفحات الداخلية للصحف وبخط صغير ، وبعد كده تدوب ويأخذ أكترها أصحاب النصيب الصالح لتأمين مستقبل الأولاد ، ولا يتم ذكر المساعدات دى فى أدوات الإعلام الجماهيرية ( زى الإذاعة والتليفزيون ) ولا يتم التنويه عنها إلا بإشارة عابرة لكى يشعر الناس إن أى مشروعات تقيمها المساعدات الأجنبية هى من عمل الحكومة وعطاء الحكومة
|