[elmafdy]

هانى

ربنا موجود و قادر يفرز و يميز اللى جوه القلوب . . . و قادر برضه انه يعين و يساعد و يقوى و يشدد . . . حتى لو كنت متخيل انهم ها يقتلوك . . . الانجيل بيقول . . . عند الأله الرب للموت مخارج .

اما بخصوص تعمل ايه فهناك 3 خطوات يمكن ان تبدأ بيهم مؤقتا :

1) اول و اهم خطوه انك تتكلم مع ربنا و تصلى كتير كتير كتير كتير . . . طول الوقت تصلى و تتكلم مع ربنا . . . أنت أكيد تعرف ان الصلاه عندنا مش كلام بيتردد و ركوع و سجود و شوية تمارين رياضيه . . . الصلاه عندنا انك تقعد مع ربنا و تتكلم معاه بكل اللى فى قلبك . . . و أنت أكيد جوه قلبك كلام كتير و حيره و قلق و خوف و تردد و تفكير فى بكره و فى اللى فات . . . الصلاه الحقيقيه اللى بأنصحك بيها انك ترمى كل ده قدام ربنا و تحكى معاه فيه . . . ما تتكسفش حتى انك تقول له انك مش مصدق لسه , و لو مصدق فأنت خايف و مش واثق انه يقدر يعديك من كل المصاعب اللى مستنياك . . . ربنا مش بيزعل من الصراحه فى الصلاه حتى لو بأمور سلبيه جوانا . . . و ما تتكسفش انك تطلب منه هوه انه يزود ايمانك . . . و يديك قدره و جرأه و شجاعه . . . و يديك معونه و تعضيد علشان تواجه ظروفك دى .
لو عرفت توصل لمرحلة انك طول الوقت فى حوار مستمر مع ربنا . . . طول الوقت . فى البيت و الشغل و الشارع و المواصلات و كل كل لحظه . . . لو عرفت توصل لكده , حياتك ها تتغير خالص . . . و مش ها تبقى وحيد او خايف من اى حاجه فى الكون و لا الحزن ها يقدر يوصل لقلبك تانى .

2) تانى خطوه انك محتاج تقرأ و تتعلم كتير عن المسيح و المسيحيه و عقيدتنا و ايماننا . . . المسيحيه رائعه فى معجزاتها و اخراج الشياطين و شفاء الامراض . . . لكنها اروع اكتر بكتير فى ايمانها و عقيدتها و حياتها . . . يعنى انت ممكن تسعد شويه لما تحصل معاك معجزه او يخرج منك شيطان او تشفى من مرض بمعجزه . . . لكن لما تعيش المسيحيه الحقيقه و تدخل فى العمق . . . ها يغمرك سلام دائم مستمر مختلف تماما . . . اقرأ عن شخص المسيح و اعماله . . . اقرأ الموعظه على الجبل مرات كتير . . . اقرأ عن معجزات المسيح و تصرفاته و محبته للخطاه . . . أقرأ عن الصليب و اللى حصل عن الصليب . . . اقرأ سير قديسين و شهداء . . . اقرأ الرسائل و اتعلم منها كل أسس الايمان المسيحى . . . و أكيد لما تقرأ ها يبقى عندك اسئله كتير عاوز تسألها . . . و احنا هنا كلنا تحت امرك و مستعدين للأجابه .

كمان حاول تقرأ عن قصص المسلمين اللى عرفوا المسيح و اتغيرت حياتهم . . . و دول قصصهم و سيرهم ماليه النت و ممكن برضه نديك روابط لمواقع كتيره فيها حالات زى كده . . . ها تشوف منهم ربنا عمل معاهم ايه . . . و ها تشوف ربنا ازاى افتقدهم . . . و ها تشوف اتعرضوا لضيقات و مشاكل قد ايه فى حياتهم . . . بس ها تشوف كمان ازاى ربنا كان معاهم فى كل خطوه و كل ضيقه اتعرضوا لها .

و ها تشوف كمان ناس تانيه كانت واخده الموضوع كدب و تهريج , أو واخداه خطوه فى سبيل اضطهاد المسيحيه او عمل فخ فى المسيحيين . . . بس ربنا لما قابلهم و افتقدهم غير حياتهم بالكامل و اخدهم لمناطق فى الحياه هما نفسهم ما اتخيلوش انهم يروحوها فى يوم من الايام .

3) تالت و اخر حاجه حاول انك تروح لأب كاهن زى ابونا مكارى او اى حد غيره . . . و تشركه معاك فى كل حاجه بتحصل لك . . . تحكى له اللى جواك . . . تطلب نصيحته او مساعدته فى اى حاجه تحتاجها . . . و هو أكيد ربنا ها يرشده للصح و ها يعمل معاك اللى ربنا يوجهه ليك .

و اخيرا ربنا موجود و عالم باللى فى القلوب و قادر انه يتمجد و يتصرف .

المفدى