تابع : بقية الحوار الممتع
يعنى مفيش غير اسرائيل ؟؟؟؟؟
صديقى المسلم : ايوه ما فيش غير اسرائيل وانا مستريح وباخد حقى وفيه قانون والدنيا متظبطه
اتجوزت اسرائيليه ؟؟؟؟؟
صديقى المسلم : ايوه
خلفت منها ؟؟؟؟
لسه ..بس هاخلف ان شاء الله
انتا عارف انهم حايبقو على دين امهم ( جنسية اسرائيلية وديانة يهودية )؟؟؟؟؟
هى اسلمت وولادى هايبقو مسلمين
هاتعلمهم عربى عشان يعرفو يقروا القران ويصلو ؟؟؟؟
هاحاول...
ماحدش فى عليتك حارب فى 1967؟؟؟؟؟
عمى الكبير مات شهيد فى 1967
عرفت مات ازاى ؟؟؟؟
لا هو راح مارجعش
حضرتك ده تاريخ وانقضى من اربعين سنه ...ما هو خال امى حارب فى 1973 ورجع معوق ذراعه ورجله اتقطعو ...ولاحد بيسال فيه ...مش دول الناس اللى حطو العلم على ارض سيناء تعرف حد منهم حضرتك...
بمناسبه التاريخ ما تعرفش اى معلومات عن دوله اسرائيل كيف ومتى تكونت ؟
لا طبعا ما اعرفش ...اعرف منين ؟؟؟؟؟
ما بتشوفش اللى بيحصل عندك ؟ الفلسطينين اللى بيموتوا والاطفال اللى بيتقتلو؟
شفت حصل ايه فى لبنان من سنتين؟
صديقى المسلم : شفت وسمعت لكن الفلسطينين نفسهم عايشين مع اليهود اخر انسجام وحلاوة تمام زى الفل
فاكر الولد الصغير اللى اسمه محمد الدره ؟ اللى مات فى حضن ابوه ؟؟؟
صديقى المسلم : ايوه طبعا ..ابوه نفسو بيشتغل عند اليهود ولغايه دلوقتى عادى جدا ...وبعدين حضرتك فاتحه معايا محضر هو مش فيه معاهده سلام وتطبيع
ما تشوف حضرتك كام رجل اعمال فى مصر بيشتغل معاهم
وهما مالين مصر سياحه والحكومه بتصدر لهم غاز طبيعى
والكل بيستودر منهم بضاعه ماليه السوق
ما تتشطر على الحكومه جات على شغلى انا واكل عيشى وبقيت متعاون مع الاعداء وخاين للوطن
تابع : بقية الحوار ... ممتع
