[elmafdy]

( كما تبين ان جميع الجثث لا توجد بها إصابات سوي في ثلاثة فقط منهم التي تراوحت إصاباتهم بين جرح لأحدهم في الوجه والآخرين بجرح أسفل القدم.)

الكلمات السابقه من مصدر مسئول فى الحكومه المصريه بخصوص القتلى ال27 من السودانيين , وضعتها هنا لأن لى عليها تعليق هام.

بداية رغم انى مررت و رأيت هذا التجمع أكثر من مره و كان موقفى منه هو الرفض التام حيث حولوا شوارع المهندسين الراقيه الى مزبله اسوأ من العشوائيات , و رغم اننى كنت اتمنى فض هذا الاعتصام , أو على الاقل نقله لمكان أخر , الا اننى أرفض تماما ما حدث , أرفض تماما التعامل مع بشر عزل أصحاب قضيه بكل هذا العنف الذى أودى بحياة 27 منه و ربما اكثر , أرفض تماما تدخل أربعة الاف جندى مدججين بالدروع و الهراوات للتعامل بكل هذا العنفو هذه الحده ,
و كان أولى برجال الشرطه أن يتعاملوا معهم بالترغيب اكثر من الترهيب , بأقناعهم أنهم سينقلون لمكان اكثر ادميه , سيجدون ظروف حياه افضل نوعا ,

أيضا كان يمكن لرجال الحكومه المصريه ان ينتخبوا منهم اكثرهم فهما و نضجا ليتحاوروا معه و يقوم هو بنقل وجهة نظر الحكومه المصريه ,

فى اسوأ الاحوال كان يمكن لرجال الشرطه ان يلقوا القبض على عدد محدود منهم و يوضعوا رهن الحبس كتهديد و عبره للباقين حتى يمتثلوا , و لكن حرب التحرير تلك التى قام بها رجال شرطتنا البواسل كانت اشبه بالعمليات الحربيه , رغم انها امام بشر عزل مساكين يعانون اشد المعاناه .

كل ما سبق كوم و الكذب الحكومى الرسمى كوم تانى , هذا الأمر بالذات هو ما يثير جنونتى و يجعلنى استشيط غضبا , المثل الشعبى بيقول " أذا كان المتكلم مجنون , يبقى المستمع عاقل " , لكن حكومتنا الرشيده تعتبرنا دايما مجانين , بل و اجن منها و سنصدق أى كلام من أى نوع , و لنتابع معا تصريحات المسئولين فى أى أمر , و ليكن مثلا حادثه حدثت فى أى مكان فى العالم , و قبل ان تصل الينا التفاصيل , و قبل ان يعرف اى شخص فى العالم الاحداث بدقه , نجد مسئولينا الحلوين يخرجون علينا بتصريحات من عينة ان الجاليه المصريه عندنا بخير , و لا يوجد مصريين بين الحادث , و فى النهايه نكتشف ان تلك الحادثه حدثت للجاليه المصريه اساسا , حينما يظهر أى وباء او مرض و ينتشر فى العالم بأكمله , نجد المسئولين اياهم على شاشات التليفزيون يؤكدون ان مصر خاليه من الوباء الفلانى , مصر نظيفه , مصر زى الفل , و نكتشف ان الخمسمايه و عشرين حاله اللى ظهروا فى العالم كله منهم خمسميه فى مصر , و هنا فى جريمة قتل السودانيين تلك سمعنا تصريحات مستفزه للغايه , خدوا عندكم مثلا :

- رجال الشرطه المصريين يتعاملون مع المعتصمين السودانيين بمنتهى اللين و ضبط النفس و بدون أى عنف , و تتدخل بمنتهى الحكمه لفض الاعتصام بطريقه سلميه وديه للغايه , و العنوان اللى اتكسفوا يقولوه ان رجال الشرطه اصطفوا صفين و مر السودانيين من المنتصف ليأخذ كل سودانى قبلتين و باقة ورد قبل ان يركب الاتوبيس المكيف الفاخر الذى خصصته له الداخليه المصريه .

- مفوضية اللاجئين بالامم المتحده تشيد بدور مصر و اداء رجال الامن فيها فى التعامل مع المعتصمين السودانيين , بل و تشكرها , انا حتى سمعت من مسئولين من عندنا ان الدمعه فرت من عينين كوفى عنان لما سمع عن رحمة المصريين و محبتهم و انسانيتهم مع السوادنيين , لدرجة انه بيفكر يبعت اى معتصمين من اى حته فى العالم لمصر علشان رجال الشرطه بتوعنا يتعاملوا معاهم بنفس الحكمه و التسامح و ضبط النفس

- كملت المهزله التصريحيه بالتصريح اللى انا ابتديت بيه المنتدى هنا , اللى بيقول انه ما فيش حد من القتلى ال27 مصاب بأى جروح سوى 3 فقط ,لكن الباقيين كلهم ماتوا موته طبيعيه , 6 كان عندهم السرطان و كانوا فى حاله متأخره , و 5 كان عندهم فيروس سى و بيخلصوا من الاول , و اتنين ماتوا بأنفجار فى الزايده الدوديه , و اربع ستات ماتوا بسبب حمى النفاس منهم واحده لسه والده من اربع سنين , و واحد مات لانه بيعمل دايت عنيف و اتسبب له فى قصور و هبوط حاد , المهم ان كلهم ماتوا موتة ربنا , و ما تخليش الشيطان يلعب فى دماغكم و تسألوا السؤال ده , " لما كلهم ماتوا موتة ربنا , اشمعنى بقى كلهم ماتوا فى وقت واحد , اللى هوه وقت الهجوم الميمون من رجال الشرطه الاشاوس بتوعنا " , لأن السؤال ده كفر و من يسأله فقد كفر و عليه ان يصوم و يستتيب , فكما تعرفون جميعا ما حدش يعرف ساعة موته و من الكفر ان نتسائل فلان مات فى الوقت ده بالذات ليه , و كما انه لا حيلة فى الرزق , فأنه لا شفاعة فى الموت , و لولا الصدفه اللعينه اللى خلت الاربعه و عشرين الغير مصابين يموتوا فى نفس الوقت بتاع التدخل السلمى الودى من رجال الشرطه ما كانش حد من الكــلاب اللى بيتسائلوا و يعترضوا زى حالاتى كده فتح بقه .

انتظر التصريح التالى قريبا : " تبين للاطباء المصريين ان الاصابات الموجوده فى جثث السودانيين الثلاثه القتلى يوم التدخل السلمى لرجال الامن المصريين لفض الاعتصام ليست نتيجة لأى اعمال عنف من قبل الشرطه المصريه , و انما هى اصابات حدثت قبل ذلك بساعات حيث كان السودانيين الثلاثه يلعبون لعبة صلح الشهيره بالسنج و المطاوى و حدثت الاصابات نتيجة ان الدور سخن و اللعب بقى على اشده .

ربنا يرحمنا

المفدى