القصة الحقيقية للمباحاثات التى قيل انها تمت بين الدولة و ممثلى الكنيسة يوم الخميس 20 اغسطس 2003
--------------------------------------------------------------------------------
8/25/2003
عندما تحدثت عن الماساة التى تمت يومى الثلاثاء و الاربعاء 18 و 19 اغسطس , كنت اعتقد ان الامر واضح و ان المصيبة التى حدثت كانت واضحة....
و عندما طلبت الحكومة عقد اجتماع مع رئيس دير الانبا انطونيوس يوم الخميس 20 اغسطس توارد الى الاذهان انها بصدد الاعتذار عما فعله احد ممثليها السيد اللواء رئيس جمهورية البحر الاحمر ( المحافظ سابقا )
و توارد للاذهان ان الحكومة بصدد معاقبتة عما فعل او إقالته و خاصة انه اساء الى سمعة البلد و السياحة
و توارد للاذهان ايضا ان الحكومة سترد الامور الى نصابها
توارد للاذهان الكثير......................
و لكن اليكم تفاصيل المأساة الجديدة او المصيبة الكبيرة
طلبت الحكومة الاجتماع مع رئيس الدير الاسقف الانبا يسطس و ممثل البابا الاسقف الانبا يؤنس فى احد فنادق الاسكندرية
و فى الميعاد المحدد فى الساعة الواحدة حضر الاثنان و لكن مالم يعرفاه ان الحكومة كانت عاملة لهم كمين ... إزاى ؟ ...
تبين ان ممثل الحكومة الوزير مصطفى عبد القادر وزير الدولة للتنمية الادارية و هو لواء ( شوفوا الصدف ) و محافظ الاسكندرية و هو ايضا لواء ( مش بقولكم شوفوا الصدف ) و طبعا عارفين ياشطار ان السيد اللواء رئيس جمهورية البحر الاحمر ( المحافظ سابقا ) هو ايضا لواء
يعنى بالبلدى ممثلى الحكومة هم ثلاث لواءات اصحاب و حبايب و تلاقيهم كمان دفعة واحدة
و حضروا و طبخوا الموضوع و كانت ريحة الطبيخ تقرف و هوا البحر ماقدرش يغيرها و عندما حضر الاسقف الانبا يسطس رئيس الدير و الاسقف الانبا يؤنس ممثل البابا كان فاضل يوكلوها لهم
اول حاجة قعدوهم فى الصالون , اصل البهوات مشغولين و طبعا ماقالوش ليهم مين البهوات لان الاسقفان مايعرفوش مين اللى هايقعدوا معاهم ... هما يعرفوا ان فيه ممثل حكومى هايقعد معاهم وبس ...
و بعد طول انتظار خرج من جوة الوزير و سلم عليهم و سأل مين فيكم ممثل البابا فرد عليه الاسقف الانبا يؤنس و قال .. انا فقال له اتفضل معايا و شاور للانبا يسطس لو سمحت انتظر شوية و انتظر الاسقف الانبا يسطس كتيييييييييييييييييييييير............
و بعد ساعة ..... اثنين .... خرج الاسقف الانبا يؤنس و هو بيشر عرق , رغم التكييف المركزى . وقال له اصل السيد محافظ البحر الاحمر ( آسف اقصد السيد اللواء رئيس جمهورية البحر الاحمر ) مش عايز يقابله . على فكرة الكلام ده حصل بجد و مش هزار
يادى المصيبة الاسقف الأنبا يسطس , الرجل اللى اتهان هو و رهبان ديره و عاوزين يهدوا له ديره و سور ديره ييجى علشان يقابل مسئول الحكومة علشان يحل المشكلة و يعاقب المحافظ اللى عمل المشاكل دى كلها يكتشف ان القعدة تتم من غير حضوره و كمان بحضور المحافظ اللى عمل المصايب دى كلها
يعنى بالبلدى القاتل زعلان لان المقتول بيقول آى
لأ و كمان مطلوب منه انه ( يبوس ايد المحافظ ) , ولا بلاش بوس الايد , يعتذر كفاية
ولسه كمان . المفروض ان الاسقف الانبا يسطس يسترضى المحافظ الغلبان و يديله ثلثين الدير و فيهم السور كمان
ليه .......(و ده بجد و مش بهزار ) لان البيه المحافظ بيموت فى الشجر و عاوز يزرع شجر فى الجبل , لأ و ايه كمان .. ماعجبوش ولا متر فى المحافظة كلها الا اللى فى الدير وما حبكتش يزرع الشجر غير فى الدير , يا سلام ع الهمة والنشاط بتاع الباشا المحافظ
ساب المحافظة كلها بما فيها الغردقة عروس البحر الاحمر و محافظة البحر الاحمر وكل المدن اللى فيها و اللى محتاجة شجرة واحدة توحد ربنا....... ساب كل ده و عاوز يزرع الشجر فى الجبل
خلو بالكم عاوز يزرع شجر فى الجبل اللى مافيهوش ولا نقطة مية واحدة ,... يكونش ها يحط تمثال رمسيس هناك بالمرة عشان يرويها بالراحة؟
المهم سأل الاسقف الأنبا يسطس انا هاقعد مع مين . قالوا له خلاص , قعدنا . ....هانقعد ليه تانى هاهاهاهاها........ و على فكرة احنا كمان كلمنا البابا و قلنا له كله تمام .
ياللا . سلام ..... سلام
وكل ده و الاسقف الانبا يؤنس بيشر عرق ( يمكن التكييف لما سمع الكلام ده إتحرق ) واضح انهم اكلوا الراجل جوه و مصمصوه و قالوا له روح ياشاطر و عملوا مكالمة منظر للبابا اللى بيزور امريكا و مايعرفش ايه اللى حصل
الاسقف الانبا يسطس سمع الكلام بهدوء و مشى و الاسقف الانبا يؤنس مش عارف يتكلم , و آدى قعدة و السلام
بصراحة مش قعدة مية مية؟؟؟
الحكومة تعلن انها هاتتدخل لحل المشكلة و عمل قعدة مع رئيس الدير للإعتذار عما حدث من المحافظ . بس ده اعلان كدة وكدة .
و الحقيقة انها عملت قعدة مع روحها و قررت ان الدير و رهبانه غلطانين و لازم يدوا فرصة للمحافظ الغلبان يمارس هوايتة فى التدمير و التخريب و هدم الدير على سوره على رهبانه و على الاسقف الانبا يسطس اللى ماقعدش مع حد عشان ما يقولش للقاتل آى , اصل القاتل مشاعره رهيفة ومش ها يتحمل , وعليه انه يختار اى طوبة من السور او الدير اللى المحافظ عاوز يهدهم و يخبط فيها دماغه و لو قال آى ماحدش هايكلمه و الرهبان يشوفوا لهم جبل تانى بعيد عن الجبل بتاع المحافظ علشان مايصطبحش بيهم ولا يشوف خلقتهم
مش قلت لكم مأساة
طبعا الاسقف الانبا يؤنس اللى يقابله و يسألة , مرة مايبقاش عارف يقول له إيه , على فكرة انا انصحة انة يروح ديره يروق دمه شوية قبل ما المحافظ اياه ما يحط عينه عليه و خاصة ان ديره فى البحر الاحمر برضو
و الأسقف الانبا يسطس بيسأل نفسه , لما الحكومة مش عايزة تقعد معايا , طلبت منى الحضور ليه؟
الرهبان قالوا ده ديرنا و مالناش مكان تانى نروحه يبقى نموت هنا احسن و فى اى وقت تقرا التحليل لبعض و لو عاوزين يدوسونا احنا جاهزين للاستشهاد
مش قلت لكم مأساة جديدة و مصيبة كبييييرة
لا الحكومة قعدت مع حد ولا حاجة , و هيييييييييييييييه ... ضحكنا عليكم
وطبعا السيد اللواء رئيس جمهورية البحر الاحمر ( المحافظ سابقا ) خرج نافش ريشه على الآخر ومارضيش يسلم على الاسقف الانبا يسطس و مشى
ومعاه السادة الزملاء و الاخوة اللواءات اللى بيطيبوا خاطره يا عينى لأنة شاف وش الاسقف الانبا يسطس و معنى كده ان القعدة ماكانتش قعدة ولا يحزنون ولا حتى وقفة
وحتى هذه اللحظة لم يتم وقف السيد اللواء رئيس جمهورية البحر الاحمر ( المحافظ سابقا ) عند حده ومين عارف ممكن يعمل إيه بين يوم و ليلة , حتى الآن الموقف معلق , و البابا مش عارف الحقيقة لانه مسافر , ملحوظة لابد منها: اللى طلب بناء السور اصلا هم المحافظ السابق و مباحث امن الدولة خوفا من العمليات الارهابية و المستندات اللى بتقول كدة تسد عين الشمس و متقدمة فى قضايا كتييير ضد المحافظ المرة دى مالقيتش دموع علشان ابكى المأساة الجديدة و ماعرفش اقول إيه لكن على رأى اخواتنا المسلمين ( حسبى الله و نعم الوكيل ) فيك يا اخى آسف ..اقصد يا فخامة السيد اللواء رئيس جمهورية البحر الاحمر ( المحافظ سابقا )
ملحوظة تانية
حنى هذه اللحظة مازال المحافظ مصراً على هدم السور , أهى طقت فى دماغه وخلاص وما تسألش ليه , و كل موظفيه و الشرطة و مباحث امن الدولة و محافظ الاسكندرية التى تمت المقابلة بحضوره , الكل عارف و متأكد من ذلك , و هو بيقول ده عينى عينك
كاتب المقاله( lol_56) لايعبر عن رأي المنظمه*
http://www.copts.net/arabic/detail.asp?id=145