عرض مشاركة مفردة
  #7  
قديم 13-05-2008
مصر وردة الروح مصر وردة الروح غير متصل
Registered User
 
تاريخ التّسجيل: May 2008
المشاركات: 6
مصر وردة الروح is on a distinguished road
مشاركة: حرام عليكم ما تولعوش فيها

يا استاذ موسى اذا كان المسلمين بيقولوا على المسيحيين انهم كفرة فالمسيحيين كمان بيقولوا عليهم كده لان الطبيعي ان كل واحد فاكر ان ديانته هي الصح و اللي مش عليها يبقى غلط و هايروح النار اظن انك متفق معايا في كده
انا عارف ان مصر طول عمرها كانت منتجة للغذاء حتى بعد دخول الاسلام و ما زالت قادرة على ذلك لكن ازاي هو دا اللي لازم نفكر فيه بدون الرجوع للدين اقصد بدون ما كل واحد يفكر في دين التاني و كل واحد يخليه في نفسه
انا عارف كمان ان جمال عبد الناصر اللي فيه مسيحيين كتير لعلمك بيحبوه غلط لما ساعد باقي الدول العربية على استقلالها و رغم كده هم بيكرهونا برضه و بينكروا الجميل و المعروف
انا معاك ان مش ممكن يجبر المسيحي على تعلم القران في مناهج اللغة العربية و ان القران يتم تعليمه في مناهج التربية الاسلامية بس و انا عارف ان دا مش كويس لان زي ما المسيحي مش عايز يدرس القران المسلم برضه مش عايز يدرس الكتاب المقدس فا ما ينفعش حد يجبر حد ان يدرس حاجة غصب عنه
لكن انا الصراحة مش معاك ان الازهر يشيل احاديث و كلام من القران لان هو دا الدين الاسلامي اللي عايز يتبعه كله براحته لكن ما ينفعش يتبع حته و التانيه لا و اظن عندكم كده برضه
بالنسبة لشيوخ الفضائيات دول ناس عايزة تكسب فلوس من ورا الدين زي القس اللي اسمه زكريا بطرس تماما و دول عقابهم هايكون شديد بالنسبة لعقيدة الاسلام لان الامام ابو حنيفة كان بيهرب من الناس عشان ما يفتيش فتوة ممكن تكون غلط و يتحمل وزرها و هو كان اعلم من كل نجوم اقصد شيوخ الفضائيات دول و المسلمين عارفين كده كويس
و اي شيخ في الجامع لو قال على المسيحيين كلام لا يليق فهو يعبر عن نفسه و انا بأكد لك من حكم تجاربي ان ما بيقولش عليهم كده غير الشيوخ الجهلة لان هنا احب اعرفك ان مش كل الشيوخ اللي بيخطبوا خطبة الجمعة على علم بالاسلام و الله العظيم فيهم اللي ما يعرفش يكتب جواب بوسطة صح و انا لي تجربة مع شيخ سألته عن هل للمسيحيين حق في بناء الكنائس و بجد انا مش باقولك الكلام دا عشان اكذب عليك و لا حاجة دا حصل فعلا قالي ان ليهم الحق قلت له هاتلي كلام يثبت كده جابلي لكن انا بجد مش فاكره و الراجل دا كان الله يرحمه على قدر كبير من العلم مش زي شوية الشتامين اللي انت تقصدهم
انا مصدقك ان فيه ناس مش كويسة و بتسعى لقتل المسيحيين لكن انت تنكر ان فيه ناس مالهاش اي عداوة معاكم؟ و كمان بيحبوكم و هم اكتر من اللي بيكرهوكم و الله كل حاجة مش كويسة بتحصل ليكم من اي واحد مسلم دا بيبقى جاهل و ربنا هايحاسبه حسب العقيدة الاسلامية
دا كان بالنسبة للاخ موسى
اما بالنسبة للاخ التاني شوتافار احب اوضح لك حاجة رغم انك برضه شميت على ضهر ايدك اني باضحك عليك و عامل نفسي كويس و انا مش كويس عموما يا سيدي ربنا يسامحك و انت مش ربنا علشان تعرف اذا كنت انا كويس و لا لأ
اول حاجة احب اعرفهالك اني احب جدا ان المصريين يرجعوا يتكلموا بلغتهم القبطية الاصليه و نفسي بجد اتعلمها لكن مش لاقي حد يساعدني
تاني حاجة انا مش عايزك تنكر ان المسلمين اللي في مصر دلوقت مصريين و بيحبوا مصر زيك بالضبط
تالت حاجة بقى انت مين اللي قالك اني باقتبس عموما ربنا يعلم اني ما اقتبستش حاجة و اني دخلت المنتدى هنا بس علشان اكلم الناس سواء مسلمين او مسيحيين انهم يرجعوا لمصريتهم و يتعلموا لغتهم الاصلية و احب اعرف المسلمين ان ايران مسلمة لكن بتتكلم فارسي و برضه تركيا و كمان المسلمين في الصين و الهند و اوروبا و امريكا بيتكلموا لغتهم الاصلية مع معرفة اللغة العربية علشان يدرسوا القران و دا اللي انا نفسي نبقى عليه في مصر خاصة اني اعرف ان اللغة القبطية لغة ثرية و جميلة و حتى لو مش جميلة فهي لغتنا الاصلية
اخر حاجة بقى ارجو منك انك تهدي معايا الحوار شوية مش معنى اني باتكلم باحترام انك تتهجم عليا و تتهمني بالكذب لاني متأكد ان اللي بيشتم على النت دا ما يقدرش يقول كلمه واحدة لو هو واقف قدام الشخص اللي هو بيشتمه في الحقيقة و ما اسهل الشتيمة و طولة اللسان على النت لانك مش هاتعرف تاخد حقك مني فاخليك محترم شوية و حسن النية يا استاذي
a tot alleur mes freres christians et muslims
الرد مع إقتباس