[مصر وردة الروح]

الاول احب اوجه كلمة للاخ زجل اللي اتهمني باكدب و برضه شم على ضهر ايده اني كداب و عرف ايه اللي انا مخبيه جوا قلبي و قصدي ايه من كلامي يا استاذي الكريم كلمة كفر بحاجة دي معناها كذب الحاجة دي يعني لما المسلم يكذب صلب المسيح اذا هو كفر بصلب المسيح اذا هو كفر بالعقيدة المسيحية لكن موضوع كافر بالله دا و لا لأ دا موضوع يعلمه ربنا بس و كمان لما المسيحي بيكذب محمد دا معناه انه كفر بمحمد و بالتالي كفر بالاسلام فهو اذا كافر في نظر العقيدة الاسلامية لكن انه كافر بالله و لا لأ دي كمان حاجة يعلمها ربنا بس و هو دا كان قصدي يا استاذ زجل ياللي مش كداب انا يا عم اللي كداب و شكرا على ذوقك لاني عارف انك متعصب و مش تقصد تجرح فيا
كلمة بقى كمان للاخ موسى ايه يا عم موسى يعني عاشت ايدك يا زجل يعني عاشت ايده انه شتمني؟ عموما شكرا لذوقك انت كمان بس المفروض تقوله عيب كده مش عاشت ايدك
طبعا انا مش ممكن افرح لما اي واحد مسيحي يموت او حتى يتأذي و لو بكلمة و انا عارف و متأكد ان اغلبية مسلمي مصر لا يقبلون دا حتى لو النظام عايز كده و زي ما النظام ظالم المسيحيين هو كمان ظالم المسلمين لكن ما بيحسش بالنار الا اللي كابشها على رأي المثل المصري يعني ممكن المسلم مش حاسس باللي بيعاني منه المسيحي و كمان المسيحي مش حاسس باللي بيعاني منه المسلم
اما بالنسبة لموضوع الكشح انا الصراحة مش عارف كم مسلم مات او اتصاب و انا ما دخلتش المنتدي علشان اتكلم في حاجات بعينها احنا عايزين دلوقت نحط نقط مهمة و محددة اهم ما فيها تحسين حياة المصريين عموما بدون النظر لاي اعتبارات دينية سواء النظام رضى ام لم يرضى و كمان ارجو من جميع الزملاء انهم ما يحاولوش يجروني لحوار ديني لاني زي ما قلت اني مش شيخ و مش ملم بكل الجوانب الدينية اللي اقدر اناقش بيها حد و اعترف ان دا قصور و خطأ مني
الى الاخ الباشا انا مش مخبي ديانتي علشان خايف منك و لا حاجة انا بس حبيت الحوار ما يكونش في الدين زي مانا وضحت قبل كده انا حبيت الكلام يكون بين مصريين و بس من غير ما عرف ديانتك و لا انت تعرف ديانتي و هو دا اللي اتمناه في المعاملات اليومية بينا و انا عارف ان فيه مسلمين بياخدوا موضوع الدين دا على صدرهم اوي و دا خطأ سببه الجهل و الغباء و انا ما انكرش كده و كمان عارف ان المسيحيين ما بيعملوش كده لكن الظاهر انكم هاتغيروا لي الفكرة دي لاني لقيتكم الصراحة بتعملوا كده في المنتدى دا
و بعدين انت بتقول وسيلتك غير نبيلة بالمرة ليه بس هو انا دخلت عليكم شايل كيس جوافة و بعدين بتفتحوه لقيتم فيه قنبلة و لا مؤاخذة؟
و انا معاك ان لازم الدمل ينفتح بخروج النظام الفاسد دا و يجي نظام مصري خالص بدون النظر للاعتبارات الدينية و اكيد ساعتها الناس كلها هاترتاح
و بعدين بلاش اصحاب البلد دي لان كلنا اصحاب البلد يا استاذي
و اقولك مين هايولع في مصر بجد هو النظام الفاسد في كل جوانبه اللي حاكم مصر دلوقت و انا رأيي ان مصر في اسوأ حال لها على مر التاريخ
اما بالنسبة للاقتراحات اللي انا باقترحها انا هاقول كل مرة على واحدة لكن يا ريت تقترحوا معايا حلول لتنفيذها و ربنا يسهل و تحصل حتى لو احنا ما شفناهاش و ولادنا اللي شافوها
اول حاجة هي ان لازم مصر تنفصل عن الدول العربية لكن فيه هنا مشكلتين الاولى تتعلق باقناع بعض المسلمين ان مش لازم علشان ابقى مسلم اني اكون باتكلم عربي و ان اكتر المسلمين تخلفا في العالم هم المسلمين العرب فعندك ايران و المسلمين في باقي انحاء العالم مش عرب لكن احسن من العرب المشكلة التانية بقى و هي الاهم اننا لو انفصلنا عن العرب فجأة كده هايتشرد ملايين المصريين طبعا لان هاتقوم الدول الخليجية اللي شغال فيها الكتير من المصريين اللي يتعدوا بالملايين بطردهم و دول طبعا معظمهم ناس غلابة لما يرجعوا مصر هايكون فيه عبء كبير جدا علينا هنا في مصر لان كل واحد في الدول دي يعول عيلة و ممكن اتنين فاياريت الناس في ردودها عليا تقترح حل للمشكلة دي علشان نقدر ننفصل عن العرب و هاتكون دي اول خطوة لرجوعنا لمصريتنا و ثقافتنا العريقة و جمال كلمة مصري و هيبتها كمان و قيمتها الجميلة اللي زال نورها
يا ريت تقترحوا عليا بدون الدخول في امور دينية
و احب ااكد ليكم اني و الله باكلمكم لخير مصر و بس و لا يهمني دينكم ايه و ربنا يشهد على كلامي
a tot alleur mes freres christian et muslim