|
س : سمعت آل أمريكا هتعملنا نظام نمشى عليه !!
ص : ياعم ولا يهمك هوه حد يعرف يتحكم فينا ؟
س : آل عاوزين يقرروا علينا الديمقراطية وحقوق الإنسان
ص : بيقولوا الكلام ده من سنة 1800 ولا عرفوا يعملوا حاجة
س : هيخصصوا للحاجات دى ملايين
ص : أهو رزق وجالنا
س : طيب هنعمل إيه ؟
ص : زى ما بنعمل كل مرة .. هنعملهم اللى همه عاوزينه شكلاً بس ، ومن تحت لتحت نخرب كل حاجة ونشتغل على كيفنا ونضرب القرشين فى جيوبنا ويادار مادخلك شر
س : لحسن تختلف المرة دى
ص : ولا تختلف ولا حاجة أكتر من فرنسا وإنجلترا كانوا هنا بجيوشهم وكنا بنلعب عليهم وبنعمل اللى إحنا عاوزينه ولفة يمين ولفة شمال ونضرب يمين ونضرب شمال ونلف عليهم يزهقوا ويمشوا وترجع ريما لعادتها القديمة ، وآدى إنت شايف قدامك بعد كل المشوار ده اللى موجود فى سنة 2000 هوه نفسه اللى كان موجود سنة 1800 بس الشكل إتغير شوية لكن النظام الأساسى مازال قائم
|