[abomeret]

ومات الكلام !

علشان منعدش نقول كلام شعارات و ناس تقوللك "شفيق" و ناس تقوللك "وامرسااااااااااااااااااااه" و الحاجات اللطيفة دى !

السياسة فى اى بلد هى لعبة "مصلحتى فين ؟" .... واللى مش عاوز يلعب اللعبة دى يبقى لو سمحت مايتكلمش فى السياسة .

انا على استعداد ان ادى صوتى لاى حد بشرط انه يقول ايه العرض بتاعه ليا !!! وبضمانات وحياة والدك علشان الكلام بتاع "ده انتوا اخواتى" و"نسيج الامة" و"الوحدة الوطنية " و"شركاء الوطن" و"الهلال و الصليب" و"ايد واحدة " مبقاش ينفع وبقى كلام سخيف.. وابقى قولوا لنفسك فى المرايا مش قدامى لو سمحت ...

حتقدملى ايه ؟!

انا هادى صوتى ... لاى حد حيضمنلى ان انا كمواطن مسيحى مش حيطبق على الشريعة الاسلامية وحيطبق علي كلام الانجيل وبس فيما يخص الاحوال الشخصية والاحوال المدنية ... انت شريعتك على عينى وعلى راسى ... باشا ... بس دى بتاعتك دى مش بتاعتى ... دى ليك انت مش لي !!! صوتى للى حيضمنلى ده ... بضمانات وتوثيق ... مات الكلام !.

انا هادى صوتى ... لاى حد يضمنلى انى لما احب ابنى كنيسة فى اى وقت وفى اى حتة انى حقدر ابنيها طالما مفيش اى مانع "قانونى" فقط مش مانع شرعى لوسمحت ولو مش فاهم معنى مانع شرعى افهمك ... مانع شرعى يعنى انى مينفعش ابنى الكنيسة علشان دى ديانة درجة تانية وعلشان احنا "*****" وعلشان احنا مشركين وكفار وغير موحدين بالله و الكلام اللى بينقط عسل ده (ومتفتحليش بقك من فضلك لانك عارف ان الكلام ده بيتقال علينا وعادى جدا ... بيس) !!! ... صوتى للى حيضمنلى انى لما احب اجدد او ارمم كنيسة مفضلش مستنى شوية تصاريح لحد ما الكنيسة ما تقع ! صوتى للى حيضمنلى ده .. بضمانات و توثيق ... مات الكلام !!!.

انا هادى صوتى ... لاى حد حيضمنلى ان حيبقى فيه قانون "ضد التمييز" وانى مش حخسر اى حق من حقوقى علشان انا مسيحى ... بمعنى انى اى حاجة تصلح لواحد مسلم تبقى تصلح لى انا كمان ... طبعا انا عارف و متاكد ان فيه ناس حتقول "طب ما الشريعة الاسلامية حاتطبق على المسلم , يبقى تتطبق كمان على المسيحى " اقوللك انا بتكلم على حقوق المواطنة يا ناصح ... يعنى المناصب العليا او حق التمثيل الحر فى مجالس الدولة وان متبقاش لي نسبة تمثيل محددة ... يتولى المنصب الاكفأ مهما كان ديانته وبأى نسبة !!! ... مثل تانى لو تحب ... ان يبقى فيه مسيحى يقدر يبقى رئيس قسم امراض النسا والتوليد فى كلية الطب ( وانا لحد دلوقتى مش عارف ايه السبب الحقيقى ان مفيش حد مسيحى يقدر يتولى المنصب ده او بحاول اقنع نفسى انى معرفش السبب الحقيقى لان للاسف السبب اللى انا عارفه سبب فى منتهى القذارة !!!) صوتى للى حيضمنلى ده ... بضمانات و توثيق ... مات الكلام !!!.

انا هادى صوتى ... لاى حد يضمنلى ان حيبقى فيه قانون ضد "ازدراء الاديان" يضمنلى كرامتى ... يعنى مش لازم كل يوم جمعة ابدأه بان فيه واحد عمال يدعى علي ويقول على كافر ومشرك ... ومش لازم افتح قناة الاقى واحد بيقول ان الانجيل محرف وان انا بعبد تلاتة وان الخمرة عندنا عادى وان الجنس مباح وكل الكلام المهذب ده ... اللى يغلط فى دينى لازم يتحاسب والعكس كذلك ... ومش لما اتفرج على فيلم الاقى لازم واحد مسلم بيحب واحدة مسيحية !!! بقت بايخة بقى وجرب اعمل العكس و شوف نفسك حتحس بايه ؟! عايز واحد يضمنلى انى اعيش محترم وكرامتى متصانة وان محدش حيتعرضلى علشان انا مسيحى ! صوتى للى حيضمنلى ده ... بضمانات وتوثيق ... مات الكلام !!!.

انا هادى صوتى ... للى حيضمنلى حرية الاعتقاد ... لو انا مسلم وعايز ابقى مسيحى او لو مسيحى وعايز ابقى مسلم ... انا حر ... يا اخى من شاء فليؤمن ومن شاء فليكفر ... وزي ما انت ليك الحق انك تدعو الناس للاسلام , انا من حقى ادعو الناس للمسيحية .... وباحترام على فكرة مش لازم نشرشح لبعض ... صوتى للى حيضمنلى ده ... بضمانات وتوثيق ... مات الكلام !!!.

انا حدى صوتى ... للى حيضمنلى ان زى ما ولادى بيدرسوا القرأن فى المدرسة , ولادك لازم يدرسوا الانجيل كمان ونلاقى ارض مشتركة بيننا نقف عليها واحنا محترمين بعض ! صوتى للى حيضمنلى ده ... بضمانات و توثيق ... مات الكلام !!!.

و من الاخر انا مش عاوز ادى صوتى لا لمرسى و لا لشفيق ... انا عايز ادى صوتى للى حيضمنلى الكلام ده حتى لو كان الراجل الاخضر نفسه !.

فمن فضلك قبل ما تقول المسيحيين خونة وضد الثورة (على اساس ان الاخوان هم حماة الثورة طبعا) وحينتخبوا شفيق ...
خليك فاهم و ماترددش كلام وخلاص ان الاقباط حيدوا صوتهم للى حيديهم ضمانات اكتر ...

واحب اقوللك من دلوقتى ان الاخوان مش عاوزين يدوا ضمانات لحد لانهم عندهم داء السلطة ... ومجلس الشعب والدستور وانتخابات الرياسة يشهدوا ...

على الاقل احمد شفيق كان اول واحد يعزى الكنيسة فى انتقال قداسة البابا ... ومجلس الاخوان رفض يقف دقيقة حداد على قداسة البابا ...
على الاقل شفيق اقترح ان منصب نائب رئيس الجمهورية يبقى لشخصية مسيحية ...
على الاقل شفيق ابدى عدم اعتراضه على تولى الاخوان منصب رئاسة الحكومة ...

مهدى عاكف كفْر الخروج عن الحاكم و الاخوان كانوا بيقولوا على الثوار جماعة "بانديتا!!!"

انا اسف بس اللى حيلومنى بعد كده انى مصوتش لمرسى من غير ضمانات موثقة .. بكل ادب و احترام و محبة و مودة اخوية ....... حدب صباعى فى عينيه !

انا مع شفيق !

اسف لو دايقت حد بكلامى لكن العيب مش على الكلام !.

ملحوظة: كلامى غير موجه لاحبائى المسلمين . كلامى موجه الى كل اللى عاوزنى ادى صوتى لمرسى .... كده وخلاص !.

و مات الكلام !

منقول