طلب مساعدة

[elmafdy]

المشكله يا أختى العزيزه رانيا أننا كلنا ما عندناش حاجه نقدر نقدمها لك اكتر من الصلاه من أجلك , اعتقد انك عارفه كويس ان اللى بيقبل المسيح فى مصر و يغير حياته مافيش حد بيقدر يساعده و لا يعمل له حاجه , و لا حتى الكنائس او الكهنه.

اختبارات الناس اللى زيك كلهم بتكون عباره عن هروب و اختباء و ضيقات و متاعب كتيره , و اغلبهم بيتصرف بمعرفته لغاية ما يلاقى اى وسيله يهرب بيها من مصر و وقتها بيقدر يتعمد و يجاهر بأيمانه .

و حتى اللى بيتجرأ و بيقرر انه يعلن ايمانه و هو جوه مصر ده بيكون على مسئوليته الشخصيه و بيتحمل نتيجة قراره ده و برضه ماحدش بيساعده من الكنيسه او المسيحيين .

يعنى اذا كان المسلمين عندهم اوهام ان المسيحيين بيعملوا زيهم و بيغروا غير المسيحيين بالفلوس و المساعدات و السفر بره و غيرها من الاغراءات و الوعود علشان ييجوا للمسيحيه , فالحقيقه عكس كده تماما , اللى بيعرف المسيح ماحدش بيساعده و لا بيقدم له حاجه اكتر من الصلاه لاجله , و قصص الحالات اللى زى دى كلها موجوده على النت بالصوت و الصوره , لو سمعتيها ها تكتشفى هما قد ايه حاربوا و مشيوا ضد التيار و الوحيد اللى ساندهم و ساعدهم كان المسيح نفسه .

دى مش دعوه لليأس او الاحباط , بس خليكى فاكره الحقيقه المهمه دى , ان المسيحى انسان بيمشى ضد تيار العالم , و فى أغلب الاحوال مش بيلاقى مساعده بشريه من اى ايد بشريه اكتر من الصلاه لأجله , لكن المعونه الحقيقيه ليه بتكون من ايد المسيح .

علشان كده انا نفسى نعرف اكتر و اكتر عن تفاصيل قصتك , جايز يكون فيه بيننا اللى يقدر يساعد فى جزئيات معينه لو فى استطاعة حد , لأن الموضوع مالوش أليه ثابته او اسلوب متبع فى الحالات اللى زى دى .

المفدى