مــايــكل مــنير و القضيه القبطيه

[فارما]

الى السيد المحترم مايكل منير تحية طيبة وعطرة
لا أعلم ادا كنت حتقرأ كلامي ده ولا لأ لكن احنا بنكتب في الموقع ده اللي المفروض يكون بداية الامل والحياة المحترمة لكل الاقباط ، انا عاوز أسألك عن الموقع ده باللي هو حسب إدعائك منبر للحرية وواحة للإنسجام واللي بتسعى من وراه إنك تقيم دولة مدنية تقوم على اساس علماني تحترم كل الاديان يعني عكس ما نراه على موقعك ده ، انت بتقول ان هناك تخلف ورجعية وانا معاك في ده لكن اللي انت حتجيبوا لينا هو التخلف والدمار بعينه"مع الاعتدار" ليه :
1) لانك عاوز تفرض على الجميع الطريقة الامريكية اللي ناسبتك ولن تناسب المجتمع المصري بحكم انك بتنسى إزاي تتعامل مع التطرف الديني الاسلامي ، يعني لما تيجي انت علشان تحكم حتكون نظرتك انو كل المسلمين متطرفين وكده بتفتح علينا باب عداء مع جميع المسلمين اللي في البلد .
2) "انت الديموقراطية الموعودة" يعني امريكا هي اللي حتحكم بمعنى آخر انت حتيجي على دبابة امريكاني او بعد ضغوط على البلد وحتمثل الاقباط ويكون صوتك هو اللي عالي حتى اعلى من الكنيسة والبابا ، ويبدأ وضع الاقباط كلهم في خانة إنهم عملاء وعاوزين يقطعوا البلد " ما تزعلش مني انا بناقش بطريقة حضارية " ارجو انو ما أحصلش على شتائم من اصحابك ومعجبيك في الموقع ده " الحضاري " .
3) إزاي تقنع اي مسلم داخل مصر بإنك انت حتحترم دينه ومش حيكون هناك شتم ولا إهانه ولا ابو غريب تاني وموقعك ده لا يخلوا من الشتائم والسب لأقدس شيء عند المسلمين ، حتى لو كانت مش منك لكن انت شايف وساكت ، يعني بكرة برضه لما تحكم حتشوف وتسكت ، ولما تسكت الاوضاع حتولع وتبدأ المجازر بين الطرفين ، وده بسبب سياستك الحكيمة ودخلتك علينا علشان تنتشلنى من الجهل وتحطنى في الدم .
4) يا ترى لما تيجي وتبدأ المشاكل في البلد ممكن انت تبقى ولا حطير تاني لامريكا ولا يمكن المرة ده اوربا يعني تولعها وتهرب ويروحوا فيها فقراء الاقباط والبسطاء والمؤمنين .
5) انا ما بكرهكش لكن بتكلم مع واحد المفروض يكون درس كل خطوة ، مش يصير فينا متل العراق او الجزائر يمكن انا من النوع الحريص على دم اولاد وبنات ديني علشان ما يروح في الهوا وراء مكاسب سياسية يمكن تيجي ويمكن ما تيجي يمكن لما تيجي ما تعرفش تحافظ عليه .
كل الحب الصادق