حادث مروع على الطريق الدائرى

[Dr.Yousef_Matta]

الطرق البرية في مصر مغامرة بكل المقاييس

خصوصا في المناطق الزراعية

حد يعرف الطريق بين اسكندرية ودمنهور ودسوق ؟ ده طريق مهما جدا وبيستخدمه اعداد كبيرة

اتفرج على كمية الحوادث والقتلى كل يوم

طريق والله لا يصلح للاستخدام الادمي

الصيف اللي فات صديقي الانجليزي كان هنا بيزور مصر وطبعا شاف اهم معالمنا السياحية زحام القاهرة ولما جه اسكندرية وشاف سواقة الكورنيش قاللي ان المرور عندنا كارثة ومحتاج تدخل من مجلس الأمن ولفت انتباهة حاجتين مهمين قوي

الاولى ازاي مفيش على جانبي الطريق طريق خاص للشرطة والاسعاف و لوقوف العربيات اللي بتركن على جمب لعطل او اي حاجة؟ طبعا دي حاجة موجودة في كل العالم حتى عند البدو في دول الخليج لكن احنا مفيش واعتقد معظم المصريين ميعرفوش عن لزوم الحارة دي في اي طريق
يعني في مصرنا الحبيبة لو الدنيا زحمة سوف يموت المريض المحتاج يوصل المستشفى بسرعة

الحاجة التانية هي ان الناس بتعدي من حارة لحارة من دون اشارة والحارات مش ملتزمة بسرعة محددة لكل حارة
الناس اللي بتسوق على اسكندرية فاكرين ان الشرطات البيضاء المرسومة على الاسفلت هي زينة للشارع؟ محدش في باله نهائيا نا لكل حارة سرعة محددة وان لازم تدي اشارة لما تعدي من حارة لحارة

احنا بنهزر كل ما نفتكر المرور في مصر والطرق

لكن لما نشوف اهلنا وحبايبنا بيموتوا بالسبب ده
لو والدتك او اختك او ابنك او مراتك ماتت عشان موصلتش المستشفى من الزحمة
لو ابنك مات في حادثة عشان السوق متهور ومش ملتزم ومفيش قانون يخوفه

ساعتها هنعرف ان دي مش حاجة نهزر عليها.