حوار مع أحد كبار الأساقفة عن هذا المنتدى - للحذف؟

[bemoi]

أنا اللى أعرفه يا جماعة ان الوحيد اللى من حقه يدخل ملكوت السموات هو من آمن بسيدنا و مخلصنا يسوع المسيح. اكتفى بهذا الرد طالباً من ادارة المنتدى الغاء هذا الموضوع لما أثار من جدال و نقاش خارج صلب الموضوع فحتى الآن لا أجد رداً واحداً على ما قلت.

المحبة لا تسقط أبداً

موسى الأسود: أنا طبعاً ما أعرفش ايه هو الثيؤطكيات الواطس و لا عمرى سمعت عنه و مش ده اللى هيقول لو كنت مسيحى و لا لأ. و عايز أقولك ان حضور القداس و حفظ الانجيل عن ظهر قلب مش ده اللى بيخلينا مسيحيون و انما العمل بكلمة الله هى اللى بتخلينا مسيحيين بجد. و لما بعلم الولاد فأنا بعيد عن كل ما هو لاهوتى كنسى و للتوضيح يعنى ممكن نتكلم فى مواضيع زى : المبادرة بالاستلطاف. الروح الرسولية. صلاة التقدمة المعاشة. الصلاة الشخصية. مراجعة الحياة. الاختلافات و قبول الآخر. المجتمعات فى حياتى. دوائر العلاقات. كيف أكون انسان مسيحى فعال فى مجتمعى.
هدف الكشافة (أحد أنشطتى): تكوين مواطن مسيحى صالح.
هدف نشاط أغصان الكرمة لسنة 2006: نكشف عن أساساتنا. فنبنى حجراً بحجر... سيصير البناء عظيماً
و اكتفى بأن أقول انى بأسيب الكلام اللى زى "ختام الثيؤطكيات الواطس" للى بيعرفوا فيه أحسن ما أفتى أنا.

Mark: بجد أشكرك فأنت أول رد عاقل أحصل عليه. فلم أجد سوى ردود الاساءة و التكذيب.أكيد أنا مش زعلان من حد. فأنا معرفش اللى فى قلوبهم عشان أزعل منهم. أنا بس مستغرب من ردود الأفعال.

أنا مش مسلم لكن احترم الاسلام؟ ليه؟ لأن ربنا هو اللى خلق المسلمين و كل بنى آدم فيهم روح اللـه حتى لو كانوا بيعبدوا تمثال بطوط و ده اللى بيميز الانسان عن الحيوان ان ربنا نفخ فى آدم فصار انساناً و انما الحيوان "كن, فكان" و احترم جميع الديانات و المعتقدات البشرية حتى لو كانت غريبة على البعض. ليه؟ لأن ربنا وحده هو اللى يقول مين فيهم صح و مين غلط. و مادام عايشين وسطينا و بيشوفوا نفس السما اللى احنا بنشوفها اذن فيستحقون كل الاحترام و التقدير لأن عين الرب عليهم. هو عارف كل واحد فيهم. عدد شعر راسهم عاددها. و عارف بداية و نهاية كل واحد. و هو الوحيد اللى يقدر يعرف قلوبنا فيها ايه.

و طبعاً لا أقبل الاهانات و الاساءات فكثير من الجهلة يستخدمون القرآن فقط لتبرير أعمال العنف التى يقومون بها (كما يفعل بعض الأعضاء الذين ردوا علىً لكن المرة دى من الانجيل للأسف) و لا أقبل ان يسئ أحد الى ديانتى لدرجة ان مفيش حاجة تستفزنى غير سب الأديان و اتذكر المرة الوحيدة التى تشاجرت فى الشارع كانت مع أحد الأشخاص اللى شافنا خارجين من الكنيسة فشتم. و بعد الكلام معه وجدته اليوم التالى منتظرنى فى نفس المكان ليعتذر لى. فروح الله وصلته و كلامى أثر فى نفسه.
و أعتقد ان الاهانات التى بتتقال فى الاذاعة و التلفزيون كلها من ناس فاضيين عايزين يعملوا ضجة. و أكيد الانجيل ما علمناش نرد الاهانة باهانة و انما نصلى بكل تواضع و خشوع من أجل ان يضع الله فى قلوبنا روحه القدوس لنحس بالسلام الداخلى لكى نتعامل مع المجتمع الخارجى بمحبة الآب اللى لوحدها كافية انها تصد عنا كل شر. و عايز أقول أن مش كل المسلمين كدة. كل واحد فينا ما يقدرش ينكر وجود واحد على الأقل مسلم فى حياته.

كل اللى كنت باطلبه مش انكم ما تقولوش رأيكم عن الاسلام انما تقولوا رأيكم بمحبة و اتزان. يعنى فعلاً انا قريت شتايم فى المنتدى ده من المسيحيين ما كنتش أتخيل أصلاً أنها موجودة.

يا جماعة غيروا على مسيحيتنا. احنا نور العالم. احنا اللى شايلين المسئولية الخطيرة دى فى مجتمعنا و لازم نبان بمظهر مشرف يليق بيسوع له كل المجد.

آمين ان يكون كلامى وصل.