هل من الممكن أن يصبح رئيسا؟

كتير جدا امريكان مهاجرين رشحوا نفسهم زى مايكل عندك مثلا احمد حسن فى هيوستن(استاذ فى القانون مصري) سامى حداد(لبنانى فى بورتلاند اورجون) حمدى غباشى (مصري فى بوسطن) فايق بشاره فى فيجاس(مصرى) مايكل متير فى فرجينا و بشاره قسطندى فى سان فرانسيسكو الخ
ده حتى فى واحد مغنواتى مكسيكى نازل الانتخابات اليومين دوول وعاوز يكون حاكم لولايه تكساس
اى واحد ممكن يرشح نفسه بس السؤال هو ايه فرصته فى النجاح؟
وغالبا الغلابه السابق ذكرهم اعلاه بيكونوا مزقوقين من الحزب وعارفين انهم مش راح ينجحوا
بس عشان تفتيت الاصوات ضد الخصم

ثم ان فلان عضو فى الحزب الجمهوري او الديمقراطي دى مش حاجه كبيره
بعد اى مراسم الحصول على الجنسيه وتكون عاده فى قاعه محكمه فيدراليه
بيكون مندوب عن الجمهوريين واخر عن الديمقراطيين (وبعد ان يصدر القاضى قرار
حصول الجنسيه للمتقدمين ) كل واحد بيقف يقول كلمه يرحب فيها بالمواطنين الجدد نيابه عن حزبه
وبناء عليه يستقطب اعضاء جدد بالحزب وما عليه الا ان يوقع للانضمام للحزب مجانا

لكن احنا فى مصر غلابه نسمع ان واحد مننا عضو فى الحزب الفلانى نتقم نفتكر ان الجدع ده وصل الى مراكز الحكم وبقى من صانعى القرارات
وكون ان مايك او غيره بيجتمعوا مع فلان او فلان من الناس الكبار فهذا بيكون
لجمع التبرعات لصالح الحزب اولا وثانيا دعايه انتخابيه للحزب


عاوز تجتمع مع بوش سهله جدا كل ما عليك الا ان تجيب مكان وتعمل عشاء ويكون السعرمناسب لشخص المدعو
وتعزم شويه ناس مستعدين ان يدفعوا فى عشاء (حته لحمه تحلف عليها وقرنين فاصوليا خضرا وحته جاتوه وكبايه مياه) حوالى 1000$ وغالبا ما يحضر هذا العشاء الناس اللى عندهم فلوس كتيره او تجار عشان ياخد صوره مع نجم الحفل ويعمل بيها مصالح او عشان يتفشخر ويقول انا اتعشيت مع فلان
او واحد عجوز ومراته ماعندهمش حاجه تانيه يعملوها

واظن الجماعه اللى عايشين بامريكا دايما بيجيلهم دعوات زى دى
على البريد اللى بنسميه هنا بريد الزباله
مش عشان سواد عيونه لكن عشان خاطر فلوسه
آدى يا اخوانا حكايه فلان اللى بيتعشى مع فلان
واحنا فى مصر نقول ياما هنا ياما هناك