مكسيموس: انا بحب محمد النبي .....(مدموج)

[kittyy]

امبارح جه سى ماكس ميشيل على قناة 90 دقيقة وعمل معاه معتز حوار جامد اوى عجبنى جداً بصراحة . معتز دا طلع نمرة :)

المهم بقى ان الحج مكسيموس دا بيتكلم كإنه من وادى تاااانى خالص ، بيقولك انا بتبع المسيح فى تعاليمة اللى قال فيها ان نحب الكل فلهذا أنا كان لازم اتعلم احب محمد نبى الإسلام .

بس اقولكم على حاجة فيه جزئية مش وحشة فى كلامه : وهو بيقول انا بنادى بفصل الدين عن السياسة انا مفروض احترمك واحترم عقيدتك اياً كانت حتى ولو كنت مختلف عنك فى الايمان والمعتقدات (ودى انا موافقاه عليها)

والجزئية التانية برضه اللى اتكلم فيها بتاعة القدس : قال انا رافض جداً ان الكنيسة تفرض على الناس انها لا تذهب للقدس وتؤدى مناسك العبادة وتزور الأماكن المقدسة دى. يعنى ايه ناس يروحوا فى رحلة سياحية للقدس علشان يزوروا الاماكن المقدسة وبعد ما يرجعوا يلاقوا انفسهم محرومين من دخول الكنيسة القبطية !! طبعاً انا ارفض هذا الفرض شكلاً وموضوعاً ، انا ممكن اقول للشعب ما يروحش القدس ماشى كنوع من انواع التضامن مع قضية الشعب الفلسطينى لكن كونى احرم حد من دخول الكنيسة علشان كان نفسة يروح القدس ويزور الاماكن المقدسة ! لأ طبعاً ودا انا برفضة بشدة

فا معتز رد عليه بيقولة ايوة بس البابا شنودة فرض كدا على الاقباط كنوع من الوطنية لأن اكيد ماحدش ابداً يرضيه الفلسطنيين اللى بيتدبحوا كل يوم فى فلسطين على ايد اليهود ، رد عليه وقاله : ومال دا بالدين طيب ؟
يعنى القضية الفلسطينية دى امور سياسية لكن الأماكن المقدسة دى لها علاقة بالدين والرغبة فى زيارة الاماكن المقدسة حق لكل واحد يبقى مش من حق اى حد يحرم الناس تدخل الكنيسة علشان راحوا زيارة سياحية للقدس علشان كان نفسهم يشوفوا الاماكن المقدسة والمكان اللى اتولد وعاش فيه السيد المسيح. (ودى كمان على فكرة انا موافقاه فيها)

والحاجة المهمة بقى فى الكلام واللى فهمتها انه تقريباً عاوز يدخل طائفة جديدة للطوائف الأرثوذكسية وقال ان الارثوذكسية ليها 35 مجمع فى جميع انحاء العالم وكل مجمع منهم ليه البابا الخاص به ، علشان كدا هو عاوز يعمل مجمع يكون هو البابا عليه. وقال ان القضية ستُنظر اليوم الثلاثاء 23 اكتوبر2007 فى المحكمة واذا اعطته المحكمة الموافقة بأن يكون له شرعية فى مصر اوكى لم تعطيه المحكمة الموافقة فالموضوع منته بالنسبة له وسيبحث عن مكان اخر يبنى فيه كنيستة .

هذا كان مختصر الحوار..

أه فيه واحد اسمة حاجة لبيب كان عاوز يسأله اسألة مباشرة على الهوا لكنة رفض بشدة وقال هذا الشخص الذى سبنى وشتمنى فى الصحف وقال عنى دجلاً انا لن يكون بينى وبينه اى حوار او مناقشة ابداً مهما حدث . وفضل مُصر على كلامة لأخر لحظة.

والسلام ختام ..

بس عاوزين نعرف ايه اخبار القضية واتحكم فيها بإيه ........