شكرا على سوء الظن

[Mrs 2ana 7or]

المشاركة الأصلية بواسطة rizk nabil

دب خلاف شديد فى ادارة المنتدى كاد ان يصل الى اجبار احد المسؤلين الكبار الى تقديم استقالته
بسبب تعرض شفافية ونزاهة المنتدى للانتقاد والتجريح بعد حصول مدام انا حر على الجولديوزر بعد مرور يومين فقط اى 48 ساعة من تاريخ اشتراكها بالمنتدى واليكم السيناريو الذى جرى فى
الادارة وفى منزل السيد انا حر كما كتبه احد المغرضين:
المدير العام يرفع سماعة التليفون طالبا السكرتيرة
السكرتيرة : الو صباح الخير يا افندم
المدير العام :ييجى منين الخير بس شوفيلى. مين المشرف الموجود دلوقتى فى المنتدى وادهونى
السكرتيرة : ادمن1 ياافندم مع حضرتك
المدير العام:ازاى يا استاذ ادمن1 عضو مشترك بقاله يومين وياخد جولد هو الفساد وصل عندنا
ادمن1:اكيد فيه سوء تفاهم بس ياافندم وانا ها اصلحه
المدير العام:ارجو انه يتصلح بسرعة وياريت مايتكررش مع السلامة
ادمن1 يضع سماعة التليفون ويذهب فورا لسحب الترقية من مدام انا حر
وعلى الجانب الاخر فى منزل السيد انا حر كان الاتى:
مدام انا حر تستيقظ مبكرا لتتابع نشاطها المكثف بالمنتدى بعد حصولها على اللون الازرق فى
يومين فما المانع ان تحصل على اللون الاخضر فى اسبوع والاحمر فى شهر وفيما هيا تتنقل
فى المنتدى لتتابع الرد على الجمهور تسقط عينيها على اللون الاسود الذى عاد يلون اسمها
واذا الجولد قد طار فتكتب رسالة سريعة الى المشرفين ان كان هناك خطا ما ولكن كان الرد ان
الخطا كان فى حصولها على الترقية وقد تم تصليحه. فاذا بها تتجه الى المطبخ بسرعة الاعصار
بحثا عن زوجها الذى كان يجهز للافطار
مدام انا حر:انت يا منيل على عينك
السيد انا حر:ايه فى ايه بس ياحياتى بتزعقى ليه انا ماحرقتش البيض النهاردة
مدام انا حر:طبعا اليوم اللى ماتحرقش فيه البيض تحرق اعصابى
السيد انا حر:احرق اعصابك ليه بس ما وديت العيال المدرسة وكنست ومسحت ونشرت الغسيل
وطلعت الفراخ من الفريزر تفك لحد ما ارجع من الشغل علشان اطبخ وادينى باحضر الفطار
مدام انا حر:انت ياراجل انت تقوم دلوقتى حالا تقلع مريلة المطبخ وتروح لابن عمك ساويرس
تشوف هما شالوا الترقية ليه وتخليه يرجعهالى يا اما انت عارف(رامية اياه بفنجان من القهوة
كان امامها )ولا اقولك كلمه فى التليفون الاول
يسرع السيد انا حر الى التليفون طالبا ابن عمه ساويرس
ساويرس مستيقظا من النوم :الو
السيد انا حر:كده برضه ياساويرس مش انت اللى قلت لى خليها تشترك فى المنتدى ومالكش
دعوة انا استاهل ان سمعت كلامك
ساويرس:ايه بس اللى حصل ..احكى لى انت كويس الاول
السيد انا حر:الحمدلله الفنجان ماجاش فى راسى ..سحبوا منها الترقية يا ابن عمى ويا تلحقنى
يا ماتلحقنيش
ساويرس:قولها تستنى ساعتين بس وانا هارجعهالها
السيد انا حر:انت متاكد يا ابن عمى ولا ابلغ الاسعاف من دلوقتى يمكن يلحقونى
ساويرس:عندك الرابط بتاع الاسعاف
السيد انا حر:رابط ايه ياساويرس انت لسه نايم وبتحلم ولا ايه انا باين عليا هروح فى ابو بلاش
ساويرس:غلطة لسان معلش اسيبك بقى علشان الحقك قبل الاسعاف.
يتصل ساويرس بالمنتدى ويعلم ان المدير العام هو الذى امر بذلك. يرتدى ساويرس ملابسه
ويتجه الى مكتب المدير العام لعله ينجح فى انقاذ ابن عمه ان اقنع المدير بالعدول عن رايه.
وعند وصول ساويرس تستقبله السكرتيرة مرحبة وتتجه به الى مكتب المدير وكان هذا الحوار:
ساويرس:صباح الخير يا افندم
واكمل لكم باقى الاشاعة بكره بقى علشان المدام بتندهلى.. اى اى اى
مدام نبيل رزق:انت ياموكوس مش هاتسيب المتقندل اللى فى ايدك ده وتشوف اللى وراك
نبيل رزق:ليه بس يا حياتى ما انا لميت الغسيل ورحت السوق وغسلت الاطباق فى ايه تانى
مدام نبيل رزق:والمكوة وال........وال.......وال........وال.........وال... .....
نبيل رزق:ياريت يا ك ك تبعت لى اللينك بتاع الاسعاف..بلد اشاعات صحيح

___________________________________________

حقول ايه بس الله يسامحكم على الظن السيئ ولو كنتم تعبتم روحكم وشفتم ردى على سامى والتلميحات التانيه كنتم فهمتم الموضوع بالظبط ومن غير همز ولمز
وعموما اذا كان انا حر مش عمل واسطه لروحه علشان الجولد يوزريبقى انا حعمل ازاى ؟؟؟؟
ومكنتش احب انى اكون انا وجوزى مصدر للتريقه والكلام من عينه ( انت يا منيل وحدف الشاى فى وشه )
عموما شكرا على ذوقك يا رزق نبيل وبجد المداخله وضحتلى رايكم وشكرا على ذوقكم واسفه للادمن اللى حصله مشاكل بسببى بس هو عارف انه لا انطلب منه شيئ ولا حتى بعد ما رجع الاسم اسود انطلب منه يرجعه وعنده الرساله اللى انا ارسلتها ليه ممكن يبقى يفرجها ليكم
واخيرا متشكرة وواضح انها كانت غلطه منى انى ادخل المنتدى باسم يشبه اسم جوزى بس حتتصلح وبسرعه
وبامانه كانت ساعه فقر وقت مادولى الجولد يوزر