|
|||||||
| المنتدى العام يهتم هذا القسم بالأخبار العامه |
 |
|
|
خيارات الموضوع | طريقة العرض |
|
#1
05-03-2012
|
||||
|
||||
|
يا شماتة أبلة ظاظا فيا
بقلم: دكتور/ ماهر حبيب حنفى : أم حميدة أم حميدة: حنفى حنفى : أنا لما أقول كلمة لايمكن تنزل الأرض أبدا أم حميدة: حنفى حنفى : معلش تنزل المرة دى ده بإختصار شديد إللى حصل فى موضوع التمويل الأجنبى ناس حبت تعمل عنتر بن شداد وفهموا الخلق إن المرة دى جبنا مناخير أمريكا الأرض وهيصة وزمبليطة والنقوط نازل يرف على الجرايد والتليفيزيونات وزغرطى يا يللى مش غرمانة والناس إفتكرت إن مصر الجديدة بقت أقوى دولة فى العالم وأمريكا يا عينى قاعدة تعيط على المصيبة إللى حصلت لها وإن كرامتها إتمسح بيها الأرض وخلاص مصر قررت تمنح أمريكا المعونة علشان تسند بيها نفسها المكسورة وفى عز الكلام ضاع منى الكلام وأتارينى ماسك الهوا بإيديا يا حبيبى وأه من الهوا يا حبيبى . طبعا المستفيدين من المهزلة دى كانوا كتار منهم الوزيرة فايزة علشان تبين إنها مع الثورة وإنها مش من الفلول ( أنا بأكره كلمة الفلول وما بحبش حد يتقال عليه فلول) فقامت بدور شجيع السيما إللى بيمسك العصابة كلها ويضربها بإيده الشمال وإيده اليمين محطوطة فى الجبس وهات يا زعيق والناس تصقف وهى عارفة أو مش عارفة إن الموضوع حا يقلب بغم لو مشى زى ما هى عايزة أو حتى لو إنتهى النهاية الدرامية دى . الحكومة عاوزة تكسب ود الناس وتلهيهم عن كارثة ضياع الأمن بإيدين المصريون أنفسهم وإنهيار الإقتصاد برضه بإيدين نفس المصريين ولأن الحكومة والشعب عارفين إن هما الإتنين بيضحكوا على بعض راحت الحكومة مخترعه الحدوتة وقالت للشعب بص العصفورة فراح الشعب باصص على العصفورة الأمريكانى وهى بتطير وبعدين يمسكوا فى خناق بعض لغاية ما ولاد الحلال يتدخلوا وفى الأخر كل واحد يقول للتانى سيب وأنا أسيب وتخلص الخناقة ويبوسوا على راس بعض . إخواننا البعدا كسبانين كسبانين زى المنشار طالع واكل نازل واكل فى الأول بيسخنوا الناس علشان يتلهوا فى فضيحة التمويل الغربى وينسوا مصيبة التمويل الشرقى الحلال وبعدين لما الموضوع ينكفى عليه ماجور يتغطى على التمويل الشرقى والغربى وبكده تبقى كل فلوسهم فى الأمان وما حدش حا يفتح بقه فى الموضوع لأن لو حد إتجرأ وفتح الموضوع حا يتقال إشمعنا إحنا هو إحنا ولاد البطة السودا ده إحنا بتوع الأغلبية والدستور والرئيس التوافقى إصحوا للون فيبقوا فى السليم و فى الأخر عقدوا صفقة مع الأمريكان وبرضه بنظام شيلنى وأشيلك عملوا العملة فى الضلمة وفازوا بالكعكة فى النور وقدام الناس عمالين يقولوا أحلى من الشرف مفيش يا أه يا أه . خلاصة الموضوع خلص وكل واحد عمل إللى فى مزاجه والناس المضحوك عليها وشها أحمر ومكسوفة ومكسور بخاطرها وعماله تقول بأعلى صوت يا شماتة أبلة ظاظا فيا .
__________________
(( افتحي يا كنيسه زراعك لكل متنصر جذبه المسيح اليه .. احتضنيه و اعترفي به فهو ابن لك و انت ام له ))
((فأنت الصدر الحنون له في محيط المخاطر و الكراهيه و الظلم و الارهاب الذي يتربص به )) 
|
|
| عدد الأعضاء الذي يتصفحون هذا الموضوع : 1 (0 عضو و 1 ضيف) | |
|
|
مواضيع مشابهة
|
||||
| الموضوع | كاتب الموضوع | المنتدى | الردود | آخر مشاركة |
| معلومات عن مثلث برمودا | موسي الأسود | منتدى العلوم والتكنولوجيا | 0 | 03-06-2006 11:13 AM |
النمط الخطي
