فرد السادات : هاخليه يسفرك انت وزوجاتك الثلاثه ويديك ثلاث شقق بدل واحده .. مبسوط ..؟؟
انفرجت اسارير الحارس من الفرح والسعاده وراح يدعو للسادات بطول العمر ونصره على اعدائه .. و .. و ..الخ.
وبعد الكلمات والوعود المعسوله اللى وعد بها السادات الحارس سمح لهما بالدخول من البوابة الرئيسية واتجها مباشرة الى حجره مكتب الرئيس حسنى مبارك بمساعده خاصه من الملائكه توفيرا" لاضاعه الوقت مع الحارس والسكرتارية .. والانتظار لوقت طويل قد يمتد ساعات عديده .. وربما ايام...فوجىء الرئيس مبارك بمن يفتح عليه الباب فقام من على مقعده غاضبا" كى ينهر ويوبخ هذا الشخص الذى تجرأ على اقتحام حجرة مكتبه بدون اذن مسبق .. ولكنه وجد امامه كلا من الرئيس جمال عبد الناصر والسادات فسرعان ما تبددت علامات الغضب من على وجهه وارتسمت بدلا" منها علامات الدهشه والاستغراب والحيره .. وقبل ان يتفوه مبارك بكلمه بادره السادات قائلا: ازيك يا محمد .. وحشتنا .. قلنا نيجى نزورك انا وجمال .. وندردش وياك شوية .. إذا لم يكن عندك مانع .. رد مبارك قائلا: ابدا" .. ابدا" .. اهلا وسهلا" بيكم يا فندم.
حى جمال عبد الناصر الرئيس مبارك ثم قال له : مفاجأة مش كده والا ايه يا محمد ...؟؟
- بكل تأكيد يا فندم ..
نظر السادات الى مبارك وقال : بص يا محمد .. خلينا ندخل فى المخوضوع دوغرى .. احنا معندناش وقت نضيعه فى المقدمات .. فاكر يا محمد لما انا اخترتك عشان تبقى النائب بتاعى .. تفتكر انا اخترتك ليه ؟؟
نظر مبارك إلى السادات .. ولم يشأ ان يجيب على السؤال فقال السادات ها اقولك ليه .. عشان زى ما ساعدتنى فى تحقيق نصر اكتوبر وهزيمة اليهود .. كنت عايزك تساعدنى كمان اهزم الفقر والجهل والتخلف فى مصر ... كنت عايزك تحقق معايا الرخاء والعيشة الكريمة لكل مصرى ومصرية .. وكان عندى امل كبير انك من بعدى .. تحقق كل ما عجزت عن تحقيقه للشعب .. تدخل فى الحديث الرئيس جمال عبد الناصر وسأل مبارك .. وتعرف كمان ليه انا اخترتك من وسط الوف الضباط عشان تدير الكلية الجوية فى عام 1967 .. وعينتك ليه رئيس لاركان القوات الجوية سنه 1969 .. ؟؟ هاقول لك ليه .. عشان إخلاصك لعملك وتفانيك فيه .. وعدم تحيزك أو مجاملتك لحد على حساب المصلحه العامه .. من اول مره قابلتك حسيت انك هاتلعب دور تاريخى كبير ... رأيت فيك احلامى وطموحاتى وتطلعاتى .. شفت انك ممكن تحقق الكثير لبلدك .. واهلك ولأمتك العربية من المحيط إلى الخليج .. ولكن على ما يبدو ان اختيارى لم يكن فى محله .. بعد اللى سمعته عنك .. وعن اللى ناوى تعمله .. ورد الرئيس مبارك قائلا : ليه بس يا افندم .. ايه بس اللى انا قصرت فيه .. ارض سيناء واخذتها من اليهود .. من يوم ما مسكت الحكم .. وانا نهار وليل شغال .. عمال ابنى مدن جديده .. عمال اعمر الصحارى .. وابنى الطرق والكبارى ومترو الانفاق وخطوط جديده للسكه الحديد .. وشبكات الميه والمجارى والتليفونات وغيره .. وغيره..
وقاطعه جمال عبد الناصر قائلا": عملت ايه يا مبارك لملايين الشباب العاطل .. عملت ايه للناس الغلابه اللى معدوش يلاقوا حتى رغيف العيش الحاف .. عملت ايه لعمال المصانع اللى بعد ما عبنا فى بناها بعد الثورة .. رحت بعتها برخص التراب وشردت عمالها .. عملت ايه للحراميه والمرتشين واللى عمالين يمصوا فى دم الشعب..
تدخل السادات فى الحديث مقاطعا ناصر :
يا جمال احنا مش جايين هنا عشان الكلام ده .. احنا جايين عشان نسأل محمد ونتأكد من صحه الكلام اللى سمعناه .. هل صحيح زى ما سمعنا انه هايورث الحكم لابنه جمال .. وإذا كان الكلام ده مجرد اشاعات ليه لحد دلوقتى ما عينش نائب له .. مستنى ايه اكثر من 24 سنه ...
نظر مبارك الى السادات فى ضيق وقال: وايه المشكله لو تركت الحكم لابنى .. ما انت كنت هاتغير الدستور عشان تبقى رئيس مدى الحياة .. ولولا ما حدث يوم 6 اكتوبر لفضلت قاعد على انفاس الشعب لحد الآن .. وايه الغلط لو انا سبت الحكم لابنى .. حافظ الاسد عملها قبلى وترك حكم سوريا لابنه .. القذافى عمال يجهز ابنه عشان يأخذ الحكم .. ملك المغرب مات وترك العرش لأبنه .. بوش الابن قعد يحاول لحد ما خلى ابنه رئيس لامريكا .. وغيرهم .. وغيرهم .. انا مش عارف انتم والناس كمان كل ما يسمعوا سيره ابنى يجن جنونهم ويقولوا مستحيل .. مستحيل يمسك الحكم بعدى .. طب ليه .. ايه الفرق بينه وبين ابن بوش ولا ملك المغرب أو الاردن او ابن حافظ الاسد ..؟؟
يعنى احسن اسيبها لأبنى جمال والا اسيبها للمتطرفين والمتعصبين والارهابيين عشان يخربوها..
رد عبد الناصر فى غضب قائلا": يعنى عاوز تحولها إلى ملكية مره ثانيه .. طب احنا كنا قمنا بالثوره ليه .. وطردنا الملك فاروق ليه ..؟؟
ثم استمر يقول فى تهكم: يا سيدى لو عاوز تخليها ملكيه .. أولادى اولى .. او اولاد انور .. مش كده والا ايه يا انور ..؟؟
نظر السادات الى الرئيس مبارك وقال له: يا محمد مصر غير سوريا وليبيا .. لو خليت ابنك يمسك الحكم بعدك هاتقوم ثورة .. البلد هاتولع .. باين عليك مش حاسس بالقرف اللى الناس حاسه به .. الناس تعبانه .. عاوزين حد يحس بيهم .. ابنك يا مبارك ما عش وسط الغلابه والفقراء علشان يعرف بيعانوا اد ايه .. ابنك عاش فى مصر الجديدة واوربا .. ازاى هايحكم شعب معظمهم فقراء وأميين ... وعمره ما قرب منهم ولا اختلط بيهم .؟؟
ثم قال عبد الناصر موجها" كلامه للرئيس مبارك: وبعدين لما انت خايف على البلد ان الاخوان المسلمين والمتطرفين والارهابيين يخدوها مين خلاك تطلعهم من السجون .. وتدخلهم البرلمان .. مين اللى خلاك تسيبهم يتغلغلوا فى البلد ويسيطروا عليها .. مين اللى نصحك تخلى وزيرك العادلى يهادن المتطرفين ويعقد معهم الصفقات والاتفاقات .. ومين قال لك انهم مش ها يغدروا بك ويعلموا وياك اللى عملوه مع انور .. ومين قال لك ان البلد هاتبقى فى امان وسلام لو ابنك مسكها ..؟؟
ويبدو ان الرئيس مبارك اقتنع بما قاله الرئيس جمال عبد الناصر بدليل انه لزم الصمت تماما" .. ولكن السادات قطع هذا الصمت وقال: لو انا مكانك .. كنت قدمت استقالتى ورحت عشت بقية عمرى وايامى فى امريكا او استراليا او حتى سويسرا .. وتركت الشعب يختار اللى عايزه .. اوعى تفرض ابنك على الشعب يا محمد .. سيبهم يختاروا بكامل إرادتهم اللى عايزين يختاروه .. الدنيا اتغيرت يا محمد .. خدها نصيحة لو معملتش كده وتركت الشعب يختار .. هاتلاقى التغير اتفرض عليك من الخارج .. والبلد ساعتها هاتروح فى ستين داهيه .. مش كده واللا ايه يا جمال ؟؟
فرد الرئيس جمال عبد الناصر قائلا: كلامك عين العقل يا انور .. المهم ان مبارك يكون اقتنع ويعمل به .. احنا خايفين على البلد وخايفين عليك يا مبارك .. لازم تتحرك وتحقق للشعب مطالبهم .. لازم تشوف الناس عايزين ايه .. معدش فيه وقت للانتظار اكثر من كده .. البلد على وشك الانفجار يا مبارك ..
ثم ما لبث ان ساد المكان صمتا" رهيبا" .. وبعد قليل قال الرئيس مبارك لناصر والسادات : ادونى شوية وقت افكر فى الكلام اللى قلتوه .. انا ما بحبش اتسرع فى اى قرار اتخذه .. وبعدين الناس صبرت على 24 سنه .. ما اعتقدش انهم مش هايقدروا يصبرو تلاته او اربعه سنين كمان .. نكون خلصنا من مشكلة العراق وفلسطين وجنوب وشرق السودان وافغانستان .. ونكون خلصنا على بن لادن والزرقاوى والاخوان المسلمين .. ويكون حد تانى مسك الحكم فى امريكا غير جورج بوش .. وواحد تانى غير تونى بلير بتاع بريطانيا .......
توقف الرئيس مبارك عن الكلام عندما وجد جمال عبد الناصر يقترب من مكتبه ويخبط عليه بقوه بقبضه يده اليمنى .. ويقول بصوت ممزوجا" بالغضب والحزن : مفيش فايدة .. مفيش فايدة يا انور .. مش عاوز يسمع نصائحنا ومصمم يعمل اللى فى دماغه .. والعجيب انهم كانوا بيقولوا على صعيدى ودماغى ناشفه ..!!
امسك جمال عبد الناصر بيد السادات وسحبه خارجا" من حجره مكتب الرئيس مبارك واثناء خروجهما وسيرهما فى اتجاه البوابه الرئيسية لمحهما الحارس الذى كان *** من السادات التوسط لدى الرئيس مبارك لتوظيف اولاده وزيادة مرتبه واعطاءه ثلاث شقق له لزوجاته الثلاثه .. فهرع فى اتجاه السادات وقال له: عملت ايه يا بيه .. كلمت لنا الريس .. نظر اليه السادات بعطف شديد ورد قائلا : للأسف .. مكنش فيه فرصة لأن الريس كان مشغول جدا" .. بس اوعدك لما يجى لنا فوق هانكلمهولك ونوصيه عليك عشان يحقق لك كل طلباتك ورغباتك انت واولادك وزوجاتك ...
صبحى فؤاد
sobh@iprimus.com.au