يا شعبي : أحمد فؤاد نجم

[الحمامة الحسنة]

فى عيد ميلادك الكام وسبعين
كل سنة وأنت طيب وإحنا مش طيبين
كل سنة وإنت حاكم.. وإحنا محكومين
وإحنا مظلومين .. وإحنا متهانين
وياترى ياحبيب الملايين
فاكرنا ولا خلاص منسيين
فاكر المعتقلين ..فاكر الجعانين
فاكر المشردين..فاكر الغرقانين
فاكر اللى ماتوا محروقين
الله يكون فى عونك..تفتكر مين وللا مين
فى عيد ميلادك الكام وسبعين
بقولك كلمتين..الأولى شيلنا طين
وهل تعلم أن النيل بقى رشاح
والجو أصبح بيئة والعيشة ولعة
والشرفا قلوبهم على البلد ولعة
وأنت عاملهم مذبحة ولابتاعة القلعة
والإقتصاد سداح..والسرقة بقت كفاح
ومصر متاحة بس للسياح
وعرض البلد بقى مستباح
والثانية ..
ورتنا الويل
دا الخطوة فى عهدك بقت ميل
والضحك بقى نواح وعويل
والكوسة ..عارف الكوسة
ممكن أقولك فيها مواويل
والجامعة بقت ياإما كباريه أو دار مسنين
والشباب معظمهم من غير خمرة سكرانين
والعلم عز على المتعلمين
والأساتذة بقم دجالين
والقادة بقم طباخين
وادينى فى الهايف ياحبيب الملايين
والثالثة..
عارف اليابانيين
زمان فى سنة أتنين وخمسين
كان عندنا تروماى وكان عندنا علم ومتعلمين
وثقافة ومثقفين
وادبا وعلما وفنانين
وكانوا اليابانيين..بالنووى لسة مضروبين
وللصدقة مستحقين
دلوقتى إحنا فين وهما فين
هما فوق وإحنا فى أسفل السافلين
والرابعة ..
امن بلدنا بقى تنين
والمحاكم إتملت مظاليم
والعدالة بقت كمالة
وكلمة الحق فى الزبالة
وأصحابها فى الزنازين
والخامسة..
القطاع العام ..عام
والفساد .. ساد
وفى جتة بلدنا بيرعى
أفتكر لجنابك إيه وللا إيه
وكل ذكرى ليك بدمعة
أنا كنت حالف ميت يمين
أكملهم لك تمنية وسبعين
بس ها كفيهم ورق منين
وكل سنة وإنت .. وإحنا طيبين

منقول.. للشاعرأحمد فؤاد نجم

مبارك شعبى مصر