في ظاهرة غريبة.. ظهور 3 شموس في كبد سماء الصين

[elmafdy]

الظاهر مافيش داعى نفكر فى المستقبل و اللى ها يحصل الايام الجايه , و الاهم دلوقتى اننا نتوب و نفكر بس فى حياتنا الابديه . . . .

مش عارف ليه فيه ظواهر كتير جدا السنه دى بالذات (2011) بتحسسنى بقوه اننا فى أخر الايام فعلا , و ان المجئ الثانى على الأبواب .

سنه عجيبه ما أفتكرش ان كان فيه سنه زيها قبل كده

السنه ابتدت و بعد مرور عشرين دقيقه بس منها بحادثه بشعه لمصلين خارجين من الكنيسه اتقطعوا حتت.

فضلنا بعدها اسبوعين تلاته قلقانين و متوقعين حالات هجوم أخرى على كنائس تانيه زى ما كان التهديد بيقول .

ما احتجاش الامر اكتر من 3 اسابيع علشان تبتدى ثوره تقلب كل حاجه فى البلد رأسا على عقب , و تهد قدامنا كل الثوابت و كل الحاجات اللى كنا فاكرينها ضخمه و كبيره , و تنهار حاجات كنا متخيلين ان فيها أمان لينا , زى الاستقرار و النظام و الحكومه و الرئيس و الشرطه و أمن الدوله و غيرهم من المؤسسات اللى كانت محسسانا اننا فى بلد ليها نظام .

تفاصيل الثوره من يوم 25 يناير و لحد النهارده السبت 10 أبريل انتوا كلكم عارفينها , و اكيد متفقين معايا انها احداث اغلبها يقلق و يخوف و يحسس بعدم الامان و الاستقرار .

احداث الثوره كوم و اللى بيحصل لنا احنا الاقباط من بداية الثوره لغاية النهارده كوم تانى خالص , من أول حرق كنيسة رفح تانى يوم الثوره , لقتل كاهن اسيوط , لحرق كنيسة اطفيح , لقتل 13 قبطى فى المقطم , لقطع أذن المواطن القبطى فى قنا , لتهديدات متنوعه بحرق كنائس و التعرض للقبطيات و الاقباط . . .
دى مجرد امثله لبعض الحوادث و انتوا عارفين باقى الاحداث اكتر منى .

نهر النيل اللى كلنا اتولدنا و كبرنا و هو مصدر المياه الرئيسى لينا كلنا بقى فى خطر و بقينا مهددين بالموت عطشا .

الحاله الاقتصاديه فى البلد اللى مخليانا على وشك الانهيار الاقتصادى الحقيقى و المجاعات و حروب الجوعى و غيره .

على المستوى العالمى . . .
ثورات عديده فى بلاد عديده كل يوم و التانى
زلزال غير عادى دمر اجزاء كبيره من اليابان
تسونامى جديد بعد 4 سنين من الاولانى رغم ان كل الدراسات بتقول ان اعصار زى ده محتاج 75 سنه علشان يتكرر , ساب اثار مريعه و دمار
ظواهر عجيبه مخيفه زى ملايين الاسماك اللى ماتت و طفت على السطح فى بحيرات و بحار متعدده فى اماكن متعدده فى العالم فى يوم واحد
سمعت برضه ان حادثه مماثله حصلت للطيور و ملايين الطيور ماتت فى يوم واحد
اخيرا الظواهر العجيبه فى سماء الصين و امريكا و كندا , من ظهور اكتر من شمس لظهور اجسام غريبه فى الفضاء .

و يا عالم الايام الجايه شايله لنا ايه

بس اللى مؤكد ان ربنا قاصد يهز كل الثوابت و الامور اللى اتعودنا عليها طول حياتنا قدام عينينا , علشان نفوق و نحس ان مافيش حاجه ثابته و لا حاجه مأمونه و لا حاجه يعتمد عليها فى الكون , و نرجع له بكل قلوبنا و نتوب بجد و نعيش مستعدين للمجئ الثانى و الاختطاف فى أى لحظه .

انا حتى مش عارف انا كتبت المداخله دى ليه , لأول مره بأكتب حاجه من غير تفكير و من غير ما ارتبها فى تفكيرى الاول , و من غير ما اركز فى الاسلوب و انتقاء الكلمات .

جايز كل كلامى تخاريف , جايز تخوفات فى غير محلها
بس اللى بالتأكيد صح جدا فى كلامى , اننا كلنا محتاجين نتوب و محتاجين نكون مستعدين تمام الاستعداد

ربنا موجود

المفدى