مبارك يطلب العفو

[المعلم يعقوب القبطى]

أحــــلى حاجـــــــــــه
إن ماحدش عــــــــــــــــارف
حاجه

[H_SRM]

يا أستاذ

حادثة او اتنين بس دي البلد خربت
وبعدين هسالك سؤال ياتري انت بلا اخطاء؟؟ علشان تلوم اي شخص
ع الاقل كنا ف امان عن دلوقت
الشعب دة مينفعش معاة غير صدام يربية من اول وجديد لية دايما بتفتكروا للناس الوحش والسئ وبتنسوا الكويس اللي عملوة
بامانة انتوا يا مصريين شعب ما ينفع معاكم غير تدخل امريكا هي اللي هتعرف تظبطكم
طيب يا استاذ ياللي بتحيي ثورة العيال اللي حصلت ف 25 يناير عرفت ان المجلس العسكري اعلن انة ف احتمالية كبيرة انة يعلن افلاسة خلال 6 شهور ياتري فاهم معني دة اية ياللي بتقول الثورة هتنتصر

بالله عليك يا أخي مبارك كانت أخطاءه عادية؟؟؟؟

مين قالك اننا كنا في أمان!! ماكنتش بتعرف ولا تقرأ عن اللي بيختفوا واهم لاقوا عظامهم في مقابر أمن الدولة؟
ماكنتش بتسمع على اللي بيموت بتسمم أو بالتهاب كبد وبائي أو بسرطان بسبب اكل مسرطن واخرها القمح اللي مبارك أمر أنه يدخل مصر في نفس الوقت اللي كان بيصدر فيه الأرز والدقيق لاسرائيل بنصف الثمن!!!!!

ياسيدي أنا بأخطاء بس على الاقل بتوب وبتسغفر لكن مبارك لايمكن يكون تاب في يوم لان كل يوم كان بيمر بيكون أسوأ من اللي قبله.

لو سيادتك عيشتك مرتاحة او مارحتش امن الدولة وشرفت عندهم او ما مرضتش في يوم الا مالقيت دواء او ماكنتش بتقف في طابور العيش بالساعات او في طابور الانابيب بالساعات او مافيش مرة ظابط اهانك وبهدلك او حسيت بمعاناة الناس الغلابة فليك حق تقول كدة وده مش اتهام ليك بس لانك ما عشتش الظروف الصعبة فطبيعي تحس ان مافيش فرق بل شايفه بقى أسوأ.


عايزك تقولي بالله عليك انجازات حسني مبارك في 30 سنة ايه!!

مرض سواء سرطان او التهاب كبد وبائي او سرطان دم - فقر لمعدل وصل 40% - جهل نسبة لا تعد ولا تحصى في ظل قيام مشروع القراءة للجميع اللي كانت الست الهانم بتلف فلوسه - بطالة - عنوسة - زرع الفتنة بين المسلمين والمسيحين وأخرهم القديسين اللي عملها امن الدولة بنفسه - فساد اجتماعي رشاوي واغتلاس...

ياسيدي عمرك شفت وزير المفروض نواب مجلس الشعب يستجوبوه يبقى هو النائب!!ّ يعني هيستجوب نفسه!!!

انا اسف بس مش عارف اقولك ايه والله انا زيك شاب مش عارف انت متجوز ولا لا بس انا ماتجوزتش لسة وظروفي زي اي شاب بس مبسوط باللي حاصل وباذن الله فترة وهتعدي لان مصر من اغنى دول العالم كان حرام ولادها يتشردوا بالمعنى الصحيح في كل دولة ويتبهدلوا ويكون مناهم الهجرة مع ان مصر فيها كل الموارد اللي كل دولة خليجية قايمة على مورد واحد منها.

بامانة انتوا يا مصريين شعب ما ينفع معاكم غير تدخل امريكا هي اللي هتعرف تظبطكم
طيب يا استاذ ياللي بتحيي ثورة العيال اللي حصلت ف 25 يناير عرفت ان المجلس العسكري اعلن انة ف احتمالية كبيرة انة يعلن افلاسة خلال 6 شهور ياتري فاهم معني دة اية ياللي بتقول الثورة هتنتصر

لو امريكا دخلت فهيحصلها زي اي جيش فكر يدخل مصر, وانا مستغرب انت مصري ازاي بتتكلم بالاسلوب ده!! يعني نفسك امريكا تدخل!

الظروف الاقتصادية ياباشا او اي ظروف جاية او جت مش نتاجها الثورة والله ما الثورة السبب فيها, مبارك ساب البلد مفخخة زي الصحراء الغربية كل ما تمشي تلاقي لغم, الشباب اللي سيادتك مسميهم العيال دول مارضيوش يعيشوا في مهانة لو انت كنت عايز تعيش فيها فانت حر ولو انت سنك كبير فهقولك انت قبلت تعيش كدة لكن الشباب اللي استشهد ومات مسيحي او مسلم حط كفنه على ايده تفتكر ده ليه؟؟؟؟؟؟؟

انت عارف يعني ايه انسان يضحي حتى بعمره!!! يعني القضية اللي بيضحي بيها بعمره من اجهلها هو مؤمن بيها اد ايه؟؟

للأسف ايمانهم كان اقوى ايمان في مصر لانهم أمنوا بأن الحق مهدور والشعب لازم يرجع للحق ويرجعله حقه..

والايام هتثبت ان الجاي خير بس الناس تتفاءل لان مهما كان الوضع سيئ فهو مش هيكون اسوأ من ايام مبارك والله, واي حاجة بتحصل دلوقتي ليهم يد فيها بشكل مباشر او غير مباشر, ولو فيه بلطجية فهما اللي ربوها امال كانت فين الداخلية من البلطجية؟


مصر هتكون بخير باذن الله

[abomeret]

المشاركة الأصلية بواسطة h_srm

مصر هتكون بخير باذن الله

أستاذ حسام
سلام ونعمة لحضرتك .. أتمنى ذلك .. ولكن ألا ترى مثلى إن هذة الأمنية بتبعد كل شوية .. مش شايف حضرتك أزمة السولار والبوتوجاز والبنزين ؟؟ هذة هى البداية .. ألا تفهم معى مامعنى إفلاس خلال 6 شهور .. مش عارف أن المواد التموينية غير موجودة .. ولو عرفوا يوفروها الشهر الجاى مش هيعرفوا اللى بعدة .. مش عارف أن إحتياطى القمح عندنا يكفى شهر واحد .. عارف دة معناة اية ؟؟ حتى العيش مش هنعرف نجيبة .. الغنى ولا فى بالة .. هيشترية ولو ب10 جنية الرغيف .. ولا سيبك من الشراء .. دة ممكن يسافر قبرص ولا اليونان ويعيش هناك ملك بفلوسة .. الهم والغبن هيقع علينا إحنا ( انا وانت ) والجميع ...
عارف ان ماعندناش اى نوع من الدخل .. لاسياحة ولا بترول ولا قناة السويس ولا إنتاج ولا ...... العجز اصبح مفزع ...
وفية كلمة صغيرة فى ودنك .. لو انت كبير شوية فى السن .. بزمتك .. وحكم ضميرك .. مافيش اى إنجاز لمبارك الحرامى خلا ال 30 سنة ؟؟؟ فكر شوية .. ولو صغير فى السن إسأل والدك او عمك او خالك .. وفكر معايا .. اية الحل ...

[ABDELMESSIH67]

الحل في يد المجلس العسكري الخرع أو المتواطئ يا أما تطبيق القانون بكل صرامة على البلطجية و السلفيين و نظام مبارك و عائلته لكيلا تقوم ثورة أخرى و يتوقف حال البلد مرة أخرى و تكون نهاية مصر و جوعها .
الطبطبة على السلفيين و رموز النظام السابق لا تجدي و المجلس العسكري أمامه خيارين أما التنازل عن ادارة شئون البلاد لمجلس رئاسي مدني من شخصيات عامة محترمة حسنة السمعة أو الانقلاب العسكري و الا هتحدث ثورة ثانية تأكل الاخضر و اليابس .

هل يعقل أن مدون يأخذ 3 سنين سجن لانه قال رأيه و السيدة بثينة كامل تحاكم أمام النيابة لانتقادها أداء المجلس العسكري الفاشل و اللصوص الذين نهبوا مصر و قتلوا خيرة شبابها و السلفيين الذين يريدون بيع مصر للسعودية لا أحد يجرؤ على مواجهتهم و شوية الاعلام يكذب لصالحهم , مرة السلفيين ابرياء و الفاعل مجهول و مرة أصل زكريا عزمي مريض و سوزان
عندها شبه ذبحة و الرئيس بيطلب السماح و العفو................كل هذه حجج فارغة هدفها أجهاض الثورة و الافلات من العقاب و المجلس العسكري يا أما متخاذل يا أما متواطئ

[abomeret]

مبارك يتراجع ويرفض الاعتذار

بوابة الوفد

تراجع الرئيس المخلوع حسني مبارك، عمّا تردد بأنّه سيعتذر للشعب عن فترة حكمه، ويتنازل عن أمواله لصالح الدولة، بعد صدور قرار بحبسه على ذمة قضايا فساد.
ونفى مصدر، قريب الصلة من أسرة الرئيس السابق، صحة ما نشرته تقارير إعلامية حول نية مبارك إعداد خطاب يعتذر فيه للشعب المصري عمّا بدر منه من إساءة لأبناء الوطن، والتنازل عن ممتلكاته وممتلكات عائلته لصالح الشعب المصري.

وقال المصدر، وثيق الصلة بالعائلة: إنّ هذا الأمر لم يتم تداوله على الإطلاق في محيط أسرة مبارك، وأنّ ما ذكرته الصحف المحلية ينافي تمامًا المناقشات التي تجري بين الأسرة ومحاميها والمقربين منهم.

وأضاف المصدر، في تصريحات لصحيفة "المصري اليوم": "هذا الكلام ينطوي على خطورة حقيقية على موقف مبارك وزوجته سوزان وابنيه جمال وعلاء والأسرة بالكامل، لأنّ محاولة ترديد تفكير الأسرة في الاعتذار أو الاعتراف بالخطأ وطلب العفو من الشعب المصري؛ يعني أن مبارك اقترف جرائم، وارتكب أخطاء تستوجب العقاب القانوني، وهو ما يضر بموقفه في القضايا التي يواجه فيها اتهامات".

وتابع: "مبارك وزوجته يصران على موقفيهما بأنهما لم يرتكبا الجرائم، التي يتم التحقيق معهما بشأنها، خاصة أن طلب العفو والاعتراف بارتكاب الجرائم والأخطاء الجنائية لا يسقط الحق القانونى في معاقبة الفاعل، وبالتالي فإنّ الاعتذار لا يخدم موقف الرئيس السابق وأسرته، وإنما سيعد اعترافًا وإقرارًا قانونيًا بارتكاب هذه الأفعال، وهو ما سيقتضي العقاب القانوني المباشر، لأن الفاعل اعترف على الملأ وليس من حق أحد إعفاؤه من العقوبة، لأنّ القضاء والقانون وحدهما هما اللذان سيكونان المخول لهما ذلك".

وطالب المصدر وسائل الإعلام المختلفة بتحري الدقة والموضوعية في تناول التحقيقات الجارية بمعرفة النيابة العامة والكسب غير المشروع، لأنّ مثل هذه الأخبار تبث بين المواطنين قناعة تامة بأنّ المتهمين مذنبان، رغم أنهما لا يزالان في مرحلة التحقيقات الأولية، ولم يخضعا حتى الآن للمحاكمة أمام القضاء العادل.

وتساءل المصدر: "كيف يعترف شخص بارتكابه جرائم يُعاقب عليها القانون علنًا أمام شاشة التليفزيون، ولا يفعل ذلك أمام جهات التحقيق؟".

الوفد