الأقباط ومرشحي الرئاسة ......(مدموج)

[أبرهة العصبي]

بصوا هي لو هتبقى انتخابات وصناديق واصوات بجد هيبقى مرســـي. وسيبكو من الاستفتاءات والتصويتات .. لا الكلام ده بتاع طبقة تانية خالص بتوع بابي والجامعة الامريكية وعايزين نروح ستيلا بقى يا جماعة والدين يسر لا عسر... اللي هيصوتوا طبقة تانية خالص شريحة كاملة عايشين تقريبا تحت الارض بيطلعوا على الانتخابات بس عارفينهم؟ اللي هما لا يعرفوا اي حاجة في اي حاجة ومفيهومش غير لا مؤاخذة صوبع ينتخبوا بيه. يعني لو المجلس العسكري ربنا نفخ في صورته مرة في عمره واتدخل في النتيجة هيبقى ده الاحتمال الوحيد ان مرسي ميكسبش. نيجي بقى لاحتمال ان مرسي ميكسبش (وده هيبقى شيء ظريف).. هو احنا ازاي بنحكم على الناس من تصريحاتها ومبنشوفش تاريخ الناس وتصرفاتهم؟ متزعلوش مني بس اللي قريته هنا قلقني ايا كان المرشح .. الموضوع اعقد من كده بكتير ومحتاج تفكير وبحث اكتر من كده .. ازاي سياسته الخارجية متهمناش؟ العروبنجي الناصوري مش محتاج سنين عشان يخربها هو ممكن ينهي كل حاجة في وقت قياسي. ومن امتى القومجيين بيهتموا بجوة الاول؟ وايه الفرق لو كلامه عن 'المقاومة' سببه سياسي ولا ديني فهموني؟



(على فكرة انا بكتب على الكيبورد بتاع جوجل بالماوس وبنقل هنا سطر سطر عشان عارف ان الناس بتكسل تقرا الفرانكو فمش عارف 'استغذى' في الكلام)

[zaki]

انا شايف ان حمدين صباحى هو الافضل ورقم 1 وعمرو موسى رقم2
يعنى معروف جدأ انة مش ممكن اى حد يكتسح من الجولة الاولى اى يحصل على اجمالى الاصوات 50% + 1

والاعادة هتكون واحد من التيار الاسلامى ( العوا - مرسى - ابو الفتوح)
مع اى من العلمانيين ( صباحى - موسى - شفيق )

طبيعى لو اختلفنا شوية دلوقتى فا الاعادة هتجمعنا اكيد على مرشح واحد

[morco]

مرشحى الرئاسة بين فلول ظاهر وفلول خفى !

رشا ممتاز - الحوار المتمدن


يحارب البعض بما استطاع من قوة مرشحي الفلول ويقصدون موسى وشفيق فقط!!!


والحقيقة موسى يختلف الناس في كونه فلول أم لا أو لنقل يختلفون فى درجة فلوليته هل هو فلول كامل ام نصف فلول ! ولكن يأخذ عليه عدم مواجهته لفساد النظام السابق وعدم إعلانه عن موقف رافض لهذا النظام بقوة وحسم .

واذا افترضنا ان مصطلح الفلول ينطبق على كل من دعم النظام السابق ولم يواجهه بالكلمة والموقف فإن هذا المصطلح لا ينطبق على موسى وشفيق وحدهم ولكنه يشمل كثيرين من مرشحي الرئاسة وعلى راسهم مرسى وأبو الفتوح و حمدين صباحى بدرجات متفاوته فمقولة يا عزيزي كلهم فلول تنطبق على الكثيرين ممن يطلقون على أنفسهم مرشحي الثورة الجملة المضحكة اللي بتفكرنى ببرلمان الثورة !

اولا محمد مرسى : مرشح الاخوان البديل للشاطر او الاستين كما يحلو للبعض تسميته.
محمد مرسى لا يمكن انتقاده ذاتيا لأنه لا يمثل نفسه ولكنه يمثل الجماعة ففريق الجماعة نزل بلاعب أساسي هو الشاطر وعندما اصيب الشاطر فى الملعب دفع الفريق بلاعب احتياطي مكانه وهو محمد مرسى !!


و كما أن مرسى ليس كيان مستقل عن جماعة الاخوان المسلمين وانما يحركه المرشد ويملى عليه أوامره , فنقدنا لمرسى لا يمكن ان يكون مستقلا ايضا عن نقدنا للجماعة .



تستمد جماعة الاخوان شرعيتها مما تدعيه من قمع نظام مبارك لها و اعتقال عدد من اعضاءها وقياديها فإن هذا الاعتقال لم يكن لكون الجماعة واعضاءها معارضة قوية للنظام وإنما كان في إطار خطة استمرار بقاؤه باستخدام ودعم من الفزاعة !!

ويحاول الاخوان لعب دور الجماعة الثورية المعارضة على الرغم من كونها لم تعارض ابدا النظام السابق بشكل حقيقي وانما كانت معارضتها لا تختلف كثيرا عن معارضة الاحزاب الكارتونية ومعارضة مصطفى بكرى القوية !!!

فقد ادلى بديع في تصريحات له ان مبارك أب لكل المصريين وانها لا تعارض التوريث ولكن تقبله بشروط !!! وان الجماعة اعقل من ان تصدر مرشح للرئاسة !!! هذه التصريحات التى اكدها فى حوار تلفزيونى مع منى الشاذلي فى برنامج العاشرة مساءا ينعت فيه مبارك بالاب !! والشعب بالابناء ليكتشف القارئ ان بديع كان من اوائل المؤسسين لتيار ابناء مبارك !

http://www.youtube.com/watch?v=T9FybG-z2t0


تلك التصريحات ليست غريبه على جماعة الاخوان المسلمين المصلحجية المتلونة التي تتقمص دور الجماعة الثورية اليوم !! الدور الذى صدقه المغفلين بينما مركزها الحقيقي يقع في قمة هرم الفلول !



وعلى المعترض ان يجاوب على هذه الأسئلة هل سبق وخرجت جماعة الاخوان فى مظاهرات او نظمت حركات معارضه للسلطة او ناقده للسياسات الداخلية لمبارك كما فعل جورج اسحاق الساقط فى انتخابات برلمان الثورة !! مع حركة كفاية ؟؟ أوكما فعل البرادعي العميل الذى واجه التوريث !! مع الجمعية الوطنية للتغير ؟؟ وكم مره على مدار ال 30 سنه !!



فأغلب مواقفهم السياسية ومظاهراتهم ووقفاتهم الاحتجاجية كانت لقضايا وشعارات للاستهلاك المحلى وكسب التعاطف وجمع الاصوات مثل القدس ينادينا و أطفال غزه بينما يفترش اطفال الشوارع في مصر الأرصفة ويأكلون من القمامة !ولم يجدوا من يتظاهر لأجلهم !

ويشهد لهم تمكنهم التام في حرق علم اسرائيل التي اعترفوا بها الان !! ودعاءهم الدائم بالموت لأمريكا حليفتهم الاولى !!


قضاياهم لا تمس ارض الوطن ولا حياة المواطن المصري المطحون ولا سياسات مبارك الفاسدة وانما تتعلق دائما بالأخر!




السؤال الثاني الم يعقد الاخوان صفقه مع نظام المخلوع للسيطرة على جزء من البرلمان لتجميل صورة مبارك واظهار نظامه على اساس كونه نظام ديمقراطي يسمح بالتعددية ؟؟ الم يختلفوا معه على النسبة المحدودة في المجلس أى على حجم قطعة الجاتوه !

ألم يجلس الاخوان بعد الثورة على طاولة واحده مع عمر سليمان الذى يتهمونه حاليا بانه الرأس المدبر لقتل الثوار ومع ذلك لم يجدوا غضاضه في التحالف معه وعقد الصفقات والبحث عن المصالح بينما يخترق الرصاص الصدور ويقلع العيون في التحرير ؟؟

وأخيرا ألم يتحالف الاخوان مع المجلس العسكري ويعلنون في تصريحاتهم جهارا نهارا ان المجلس العسكري خط احمر وان العسكر حموا الثوره وينظمون مظاهرات من اجل غزه فى الوقت الذى سقط فيه اكثر من ألف شهيد فى محمد محمود على يد العسكر ذوى الخط الاحمر ؟؟



ألم ينهوا تحالفهم بعد ان طمعوا فى اكثر مما منح لهم وتغيرت لهجتهم بتغير اتجاه رياح مصالحهم وبعد هذا كله نجد من يقول لك ان الاخوان ومرشحهم مرسى اللى عايز الكرسى ليسوا فلولا !!!



أما عبد المنعم أبو الفتوح المرشح الاخوانى الليبرالى اليسارى الاسلامى المتعلمن فقد تقمص دور البطل القومى الذى استيقظ بعد 40 سنه من الانتماء والولاء والتدرج فى المناصب فى جماعة الاخوان المسلمين ليكتشف بعد هذا العمر الذى قضاه فى معسكرات طالبان والقيادة فى الإخوان انه منشق ومنقلب عن الاخوان ورافض لسياستهم ليكتشف انه كان منوما مغناطيسيا ومغتصبا من قبل الإخوان على عكس اراته !! على غرار افلام زبيده ثروت !! لينكر كل تاريخه الإخوانى والجهادى والقيادى فى الجماعات الارهابية وعلى راسها الجماعة الاسلامية جناح طالبان فى مصر التى استباحت دماء المصريين الطاهره لتنفيذ مخططات خارجيه تستهدف امن واستقرار البلد.




وليكتشف بعد 40 سنه خدمه!! وفى اللحظه التى قرر فيها خوض السباق الرئاسى انه رافض لسياسات الجماعة وانه ليس اخوانيا !! وان الجماعة الاسلامية التى قتلت وفجرت ليست ارهابيه !! وان من حق الانسان ان يختار دينه و إن انا مش انا و طبعا الخطاب ده لليبراليين بس..



اما لشباب الاخوان فهو إخواني إصلاحي ثوري يسعى لتطوير الجماعة ودعم شبابها ...




ومع السلفيين المؤيدين والداعمين له فهو أمير الجماعة الاسلامية التي تسعى لتطبيق شرع الله ومجاهد أفغاني طالباني في صفوف القاعدة وللمسلم كل الحق في ان يترك دينه ويختار غيره ولكن بعد ان يستتاب أولا فإن رفض فمن حقنا نحن ايضا ان نجز عنقه ونقيم عليه الحد بما لا يخالف شرع الله ! هي دي الديمقراطية ولا بلاش !

هذا هو عبد المنعم ابو الفتوح طبق خضار مشكل او بوفيه مفتوح كل واحد ينقى منه اللى يعجبه ويجي على هواه !!! لهذا لا تتعجب ان ايده ياسر برهامي وعمر عبد الرحمن والظواهري فى نفس الوقت مع ثوار يساريين وليبراليين ومسيحيين ومصريين مغتربين... فما اكثر المغفلين!!



اما السيد المناضل المحترم حمدين صباحى فرغم مواقفه النضالية المشرفة فى وجه النظام السابق فى الداخل فله ايضا مواقف نضاليه مشرفه لدعم نظم لا تقل قمعية عن النظام المصرى فى الخارج فقد كان صباحى أحد المؤيدين لصدام حسين القائد العظيم الذى لا يختلف اثنين على كونه دكتاتور مطلق ونظام حكمه كان نظاما عسكريا شموليا قمعيا لا يعرف الرحمة ولا يعترف بالتعددية والديمقراطية ويده ملوثه بدماء شعبه والشعوب المجاورة لشعبه !



كما ان له مواقف لا تقل نضالا مع معمر القذافى زعيم الثوار والقائد الملهم وملك ملوك افرقيا الذى يصف احد مشروعاته الفاشله التى اهدرت المال العام فى لبيا بانه اقوى مشروع على مستوى العالم بل على مستوى التاريخ والكرة الارضية بل المجرة التبانيه !! ولا يختلف اتنين ايضا على فساد وشمولية ودكتاتورية حكم القذافى الذى يصفه حمدين متأثرا فى رأيه بالكتاب الاخضر العبقرى بانه 37 عاما من الإنجازات !! ويكفى رقم 37 الذى اصبح 42 بعد هذا الملحق فى جريدة الكرامة بعدة اعوام عمر النظام المعمرى كأسم على مسمى !! قبل سقوطه على بد الثوار ليعبر عن ثورية وديمقراطية وانجازات النظام الليبى العظيم !!


فى الوقت الذى كان يثور فيه صباحى ويناضل حتى يمنع استمرار نظام المخلوع على الرغم من إن كان فضله12 سنه كمان لينافس القذافى ويدخل موسعة جينيس فى الارقام القياسية عن اطول فتره رئاسيه فى نظام ديمقراطى دستورى قائم على تداول السلطه كل 42 سنه ولمدة فترتين فقط لا غير !



ولا استغرب هذا الدعم من حمدين صباحى الذى يعتبره الشعب الليبي فلولا لهذه الأنظمة العسكرية البوليسية الشمولية الدكتاتورية فكلهم ابناء شرعيين لانقلاب يوليو العسكري الدكتاتوري القمعي صاحب زوار الفجر ومبتكر طرق حديثه تنافس عالميا فى التعذيب و القمع و اهدار كرامة وحقوق الانسان الذى لا زال حمدين يشارك فى تزييف التاريخ وينعته بانه ثورة ويسمى حزبه الناصري بانه حزب الكرامة !!

ذلك الانقلاب الذى اسس لحكم العسكر الذى ناضل حمدين ضد استمراره متمثلا فى نظام المخلوع ويرفضه اليوم بكل سلبياته وشموليته وفساده ودكتاتوريه وقتله للحياة السياسية وخنقه للحريات و رفضه للتغيير ! ومع ذلك يدعوا صباحى مؤيد انظمة العسكر في الخارج!! بالثورة والنزول للميادين في حالة فوز مرشح العسكر فى الداخل أولاد ناصر الأب الروحي لحزبه.... لأنه فلول !!!!



ويبقى خالد على والبسطويسى الثوار الحقيقيين والمعارضين الشرفاء اللذين رفضوا الظلم اينما وجد ولهذا فرصتهم ضعيفة او تكاد تكون معدومة لانهم ليسوا فلولا والشعب المصرى على ما يبدوا أعتاد على تعاطى الفول والفلول !

مرفق رابط المقال مع الفديوهات والصور
رشا ممتاز حركة التنوير الثورية تحضر

http://www.ta7ador.com/news-1-537.html

http://www.ahewar.org/debat/show.art.asp?aid=308584

[just_jo]

ارجو قرائة هذا المقال جيداً جداً

أضغط هنا ,,,,,,,,,,,

[أبرهة العصبي]

مالم تشاهدة في قنوات الاعلام ..الفريق والثوار ......

http://www.youtube.com/watch?v=a1S6f...&feature=share

[أبرهة العصبي]

http://www.youtube.com/watch?v=qgNMjCUvgEY

حول الإنتخابات الرئاسية

[abomeret]

ومات الكلام !

علشان منعدش نقول كلام شعارات و ناس تقوللك "شفيق" و ناس تقوللك "وامرسااااااااااااااااااااه" و الحاجات اللطيفة دى !

السياسة فى اى بلد هى لعبة "مصلحتى فين ؟" .... واللى مش عاوز يلعب اللعبة دى يبقى لو سمحت مايتكلمش فى السياسة .

انا على استعداد ان ادى صوتى لاى حد بشرط انه يقول ايه العرض بتاعه ليا !!! وبضمانات وحياة والدك علشان الكلام بتاع "ده انتوا اخواتى" و"نسيج الامة" و"الوحدة الوطنية " و"شركاء الوطن" و"الهلال و الصليب" و"ايد واحدة " مبقاش ينفع وبقى كلام سخيف.. وابقى قولوا لنفسك فى المرايا مش قدامى لو سمحت ...

حتقدملى ايه ؟!

انا هادى صوتى ... لاى حد حيضمنلى ان انا كمواطن مسيحى مش حيطبق على الشريعة الاسلامية وحيطبق علي كلام الانجيل وبس فيما يخص الاحوال الشخصية والاحوال المدنية ... انت شريعتك على عينى وعلى راسى ... باشا ... بس دى بتاعتك دى مش بتاعتى ... دى ليك انت مش لي !!! صوتى للى حيضمنلى ده ... بضمانات وتوثيق ... مات الكلام !.

انا هادى صوتى ... لاى حد يضمنلى انى لما احب ابنى كنيسة فى اى وقت وفى اى حتة انى حقدر ابنيها طالما مفيش اى مانع "قانونى" فقط مش مانع شرعى لوسمحت ولو مش فاهم معنى مانع شرعى افهمك ... مانع شرعى يعنى انى مينفعش ابنى الكنيسة علشان دى ديانة درجة تانية وعلشان احنا "*****" وعلشان احنا مشركين وكفار وغير موحدين بالله و الكلام اللى بينقط عسل ده (ومتفتحليش بقك من فضلك لانك عارف ان الكلام ده بيتقال علينا وعادى جدا ... بيس) !!! ... صوتى للى حيضمنلى انى لما احب اجدد او ارمم كنيسة مفضلش مستنى شوية تصاريح لحد ما الكنيسة ما تقع ! صوتى للى حيضمنلى ده .. بضمانات و توثيق ... مات الكلام !!!.

انا هادى صوتى ... لاى حد حيضمنلى ان حيبقى فيه قانون "ضد التمييز" وانى مش حخسر اى حق من حقوقى علشان انا مسيحى ... بمعنى انى اى حاجة تصلح لواحد مسلم تبقى تصلح لى انا كمان ... طبعا انا عارف و متاكد ان فيه ناس حتقول "طب ما الشريعة الاسلامية حاتطبق على المسلم , يبقى تتطبق كمان على المسيحى " اقوللك انا بتكلم على حقوق المواطنة يا ناصح ... يعنى المناصب العليا او حق التمثيل الحر فى مجالس الدولة وان متبقاش لي نسبة تمثيل محددة ... يتولى المنصب الاكفأ مهما كان ديانته وبأى نسبة !!! ... مثل تانى لو تحب ... ان يبقى فيه مسيحى يقدر يبقى رئيس قسم امراض النسا والتوليد فى كلية الطب ( وانا لحد دلوقتى مش عارف ايه السبب الحقيقى ان مفيش حد مسيحى يقدر يتولى المنصب ده او بحاول اقنع نفسى انى معرفش السبب الحقيقى لان للاسف السبب اللى انا عارفه سبب فى منتهى القذارة !!!) صوتى للى حيضمنلى ده ... بضمانات و توثيق ... مات الكلام !!!.

انا هادى صوتى ... لاى حد يضمنلى ان حيبقى فيه قانون ضد "ازدراء الاديان" يضمنلى كرامتى ... يعنى مش لازم كل يوم جمعة ابدأه بان فيه واحد عمال يدعى علي ويقول على كافر ومشرك ... ومش لازم افتح قناة الاقى واحد بيقول ان الانجيل محرف وان انا بعبد تلاتة وان الخمرة عندنا عادى وان الجنس مباح وكل الكلام المهذب ده ... اللى يغلط فى دينى لازم يتحاسب والعكس كذلك ... ومش لما اتفرج على فيلم الاقى لازم واحد مسلم بيحب واحدة مسيحية !!! بقت بايخة بقى وجرب اعمل العكس و شوف نفسك حتحس بايه ؟! عايز واحد يضمنلى انى اعيش محترم وكرامتى متصانة وان محدش حيتعرضلى علشان انا مسيحى ! صوتى للى حيضمنلى ده ... بضمانات وتوثيق ... مات الكلام !!!.

انا هادى صوتى ... للى حيضمنلى حرية الاعتقاد ... لو انا مسلم وعايز ابقى مسيحى او لو مسيحى وعايز ابقى مسلم ... انا حر ... يا اخى من شاء فليؤمن ومن شاء فليكفر ... وزي ما انت ليك الحق انك تدعو الناس للاسلام , انا من حقى ادعو الناس للمسيحية .... وباحترام على فكرة مش لازم نشرشح لبعض ... صوتى للى حيضمنلى ده ... بضمانات وتوثيق ... مات الكلام !!!.

انا حدى صوتى ... للى حيضمنلى ان زى ما ولادى بيدرسوا القرأن فى المدرسة , ولادك لازم يدرسوا الانجيل كمان ونلاقى ارض مشتركة بيننا نقف عليها واحنا محترمين بعض ! صوتى للى حيضمنلى ده ... بضمانات و توثيق ... مات الكلام !!!.

و من الاخر انا مش عاوز ادى صوتى لا لمرسى و لا لشفيق ... انا عايز ادى صوتى للى حيضمنلى الكلام ده حتى لو كان الراجل الاخضر نفسه !.

فمن فضلك قبل ما تقول المسيحيين خونة وضد الثورة (على اساس ان الاخوان هم حماة الثورة طبعا) وحينتخبوا شفيق ...
خليك فاهم و ماترددش كلام وخلاص ان الاقباط حيدوا صوتهم للى حيديهم ضمانات اكتر ...

واحب اقوللك من دلوقتى ان الاخوان مش عاوزين يدوا ضمانات لحد لانهم عندهم داء السلطة ... ومجلس الشعب والدستور وانتخابات الرياسة يشهدوا ...

على الاقل احمد شفيق كان اول واحد يعزى الكنيسة فى انتقال قداسة البابا ... ومجلس الاخوان رفض يقف دقيقة حداد على قداسة البابا ...
على الاقل شفيق اقترح ان منصب نائب رئيس الجمهورية يبقى لشخصية مسيحية ...
على الاقل شفيق ابدى عدم اعتراضه على تولى الاخوان منصب رئاسة الحكومة ...

مهدى عاكف كفْر الخروج عن الحاكم و الاخوان كانوا بيقولوا على الثوار جماعة "بانديتا!!!"

انا اسف بس اللى حيلومنى بعد كده انى مصوتش لمرسى من غير ضمانات موثقة .. بكل ادب و احترام و محبة و مودة اخوية ....... حدب صباعى فى عينيه !

انا مع شفيق !

اسف لو دايقت حد بكلامى لكن العيب مش على الكلام !.

ملحوظة: كلامى غير موجه لاحبائى المسلمين . كلامى موجه الى كل اللى عاوزنى ادى صوتى لمرسى .... كده وخلاص !.

و مات الكلام !

منقول